Օբաման հորդորել է Պուտինին՝ միջոցներ ձեռնարկել Ուկրաինայում մարտական գործողությունները դադարեցնելու համար

ԱՄՆ-ի նախագահ Բարաք Օբաման Ռուսաստանի իր պաշտոնակից Վլադիմիր Պուտինի հետ կայացած հեռախոսազրույցի ընթացքում հորդորել է Մոսկվային՝ հասնել Ուկրաինայի արեւելքում զինադադարի խախտումների դադարեցման: Այդ մասին, ինչպես տեղեկացնում է «Արմենպրես»-ը, ապրիլի 18-ին հայտնել է Սպիտակ տունը: «Ինչ վերաբերում է Ուկրաինային, նախագահ Օբաման հորդորել է նախագահ Պուտինին՝ ձեռնարկել Ուկրաինայի արեւելքում մարտերի զգալի ակտիվացման դադարեցմանն ուղղված միջոցներ»,- նշվում է ԱՄՆ-ի նախագահի վարչակազմի մամուլի տեղեկագրում: Բացի այդ, Սպիտակ տան տվյալներով, Օբաման ընդգծել է «Մինսկի պայմանավորվածությունների ամբողջական իրագործման ուղղությամբ շտապ առաջ շարժվելու» կարեւորությունը: Ինչպես հաղորդվում է Կրեմլի կայքում, խոսակցության ընթացքում Պուտինը հանդես է եկել «Թուրքիայի հետ Սիրիայի սահմանի փակման» օգտին: «Վլադիմիր Պուտինը կարեւորել է ԴԱԻՇ-ից եւ «Ջաբհաթ ան Նուսրա»-ից «չափավոր» ընդդիմության շուտափույթ սահմանազատման, ինչպես նաեւ Թուրքիայի հետ Սիրիայի սահմանի փակման անհրաժեշտությունը, որտեղից շարունակվում է զինյալների ներթափանցումը եւ ծայրահեղականներին զենքի մատակարարումները»,- ասված է հաղորդագրության մեջ: