Իսկ ի՞նչ կարող է առաջարկել Մոսկվան կողմերին. Հայաստանում սպասում են Սերգեյ Լավրովին.«Նեզավիսիմայա գազիետա»

«Քառօրյա պատերազմից հետո Մինսկի խմբի համանախագահները կողմերին նոր ոչինչ չեն առաջարկել՝ բացի Մադրիդյան սկզբունքները քննարկելուց, փախստականներին վերադարձնելուց, «Ադրբեջանական հողերը հետ վերադարձնելուց», անվտանգության գոտի ստեղծելուց ու ԼՂ-ին միջանկյալ կարգավիճակ տալուց, իսկ հետագայում հանրաքվե անցկացնելու հետ կապված հարցերը քննարկելուց»,-գրում է ‪«Независимая газета»-ն՝ նշելով, թե Ռուսաստանն առանց Մինսկի խմբի ավելի ակտիվ է ԼՂ հակամարտության կարգավորման հարցում, գոնե՝ ընթացակարգային առումով, քանի որ Մոսկվան փակուղի մտած բանակցությունները տեղից շարժելու պատրաստակամություն է հայտնել: «Իսկ ի՞նչ կարող է առաջարկել Մոսկվան կողմերին: Բանակցային շրջանակներում ակտիվորեն քննարկվում է Մադրիդյան սկզբունքների «արդիականացված» տարբերակը, այսինքն՝ Ադրբեջանին տալ բուֆերային գոտու 5 շրջան, փախստականների վերադարձ, խաղաղության պայմանագրի ստորագրում, խաղաղապահ ուժերի տեղակայում: Իսկ ԼՂ կարգավիճակի մասին, ակնհայտ է, որ այս փուլում խոսք գնալ չի կարող, քանի որ կողմերից մեկի օգտին յուրաքանչյուր որոշման պարագայում մյուս կողմը երես կթեքի Ռուսաստանից: Իսկ դա Ռուսաստանի շահերից չի բխում»,-ասվում է հոդվածում: Անդրադառնալով վաղը ՌԴ Արտգործնախարար Սերգեյ Լավրովի երևանյան այցին «Независимая газета»-ն՝ նշում է, Ղարաբաղյան կոնֆլիկտի շիկացմամբ հայ-ռուսական հարաբերությունները խրթին փուլում են: Կրկին սրացել է Ադրբեջանին զենք վաճառելու և Երևան-Մոսկվա հարաբերությունների իրական էության մասին հարցերը: «Երևանը հիասթափված է «քառօրյա պատերազմի» և դրան հաջորդած իրադարձությունների վերաբերյալ Մոսկվայի արձագանքից՝ համարելով, որ որպես ռազմավարական դաշնակից, Ռուսաստանը կարող էր շատ ավելի հայամետ դիրքերից խոսել: Նախ, մտահոգությունները կապված էին ռուս բարձրաստիճան մի շարք պաշտոնյաների այն հայտարարությունների հետ, թե Ադրբեջան զնեքի մատակարարումը շարունակվելու է: Եվ հետո՝ պակաս հիասթափեցնող չէր նաև ԵԱՏՄ գագաթնաժողովի տեղափոխումը Երևանից Մոսկվա՝ հօգուտ Ղազապստանի, որը ադրբեջանամետ դիրքորոշում էր ընտրել ու բոյկոտել Հայաստանի մայրաքաղաքում անցկացվելիք միոցառումը: Հայաստանը ևս հայտարարեց բոյկոտելու հնարավորության մասին, բայց զերծ մնաց այդ քայլից»,-ասվում է հոդվածում: Նշվում է նաև, որ Ռուսաստանին չի կարող չհետաքրքրել գործընկեր երկրում սկիզբ առած հակառուսական տրամադրությունները, որի հետևանքն էին վերջին օրերին ՌԴ դեսպանատան մոտ անցկացվող բողոքի ցույցերը, որոնցից երկուսը վերաբերվում էին զենքի առքուվաճառքին, իսկ երրորդը՝ Լևոն Հայրապետյանի դատավճռի վերանայման պահանջով էր: Միաժամանակ ՀՀ խորհրդարանում ընդդիմության կողմից ներկայացված է ԵՏՄ-ից դուրս գալու օրենքի նախագիծ: «Ակնհայտ է, որ Սերգեյ Լավրովին օգտակար կլինի իմանալ այս միտումի մասին անմիջապես հանրապետության ղեկավարությունից»:

ankakh.com