Դրա համար հրաժարական չեն տալիս, այլ նույնիսկ գուցե փառք են տալիս Աստծուն, որ կողքին Նավասարդ Կճոյանն է, ոչ թե...

ԴԱՀԿ պետ Միհրան Պողոսյանի հրաժարականը, կամ ավելի շուտ դրա վերաբերյալ բացատրական տեքստը փաստորեն բացահայտեց Հայաստանի իրողությունների բավական ուշագրավ մի շերտ: Պարզվում է, որ Ադրբեջանի նախագահ Իլհամ Ալիեւը կամա թե ակամա գործուն մասնակցություն ունի Հայաստանի պետական կառավարման համակարգի բարձրաստիճան շրջանակներում կոռուպցիայի դեմ պայքարի գործում: Ավելին, փաստացի ստացվում է, որ այդ գործում միակ առարկայականը հենց Ալիեւի ներդրումն է:
Քանի՞ բարձրաստիճան պաշտոնյա է Հայաստանում հրաժարական տվել կոռուպցիոն աղմուկի պատճառով: Գործնականում ոչ մի: Միհրան Պողոսյանն այդ առումով թերեւս առաջինն է իշխանության այսպես ասած «առաջինների» շրջանակում:
Իսկ ինչպե՞ս է բացատրել իր հրաժարականը Միհրան Պողոսյանը: Նա հայտարարել է, որ չի ցանկանում, որպեսզի «իր երկիրը» հավասարվի Ադրբեջանին, եւ կողք-կողքի լինեն օֆշորային աղմուկի մեջ հայտնված Ալիեւի եւ Հայաստանի ԴԱՀԿ պետի անունները:
Այսինքն, ստացվում է, որ եթե չլիներ Ալիեւի անունը, Միհրան Պողոսյանը չուներ հրաժարականի այլ պատճառ եւ կշարունակեր պաշտոնավարել: Ընդ որում, դրա եւս մի վկայություն է այն, որ, օրինակ նախկին վարչապետ Տիգրան Սարգսյանը հենց այդպես էլ վարվեց, այսինքն չնայած նրա անվան հետ կապված օֆշորային աղմուկին, որը թերեւս պակաս հիմնավոր չէր, քան Միհրան Պողոսյանի վերաբերյալ հրապարակվածը, Տիգրան Սարգսյանը հրաժարական չտվեց:
Պատճառը պարզ է՝ որովհետեւ նրա հետ կապված աղմուկի մեջ կողքին ոչ թե Իլհամ Ալիեւի, այլ Նավասարդ Կճոյանի անունն էր: Իսկ դրա համար հրաժարական չեն տալիս, այլ նույնիսկ գուցե փառք են տալիս Աստծուն, որ կողքին Նավասարդ Կճոյանն է, ոչ թե Ալիեւը: Համենայն դեպս, մեծ է հավանականությունը, որ Միհրան Պողոսյանը այժմ շատ է ափսոսում այդ բացի համար:
Բոլոր դեպքերում, այդպիսով ստացվում է, որ Հայաստանում բարձրաստիճան պաշտոնյաների «առաջին գծում» կոռուպցիայի համար պաշտոնանկության առայժմ միակ գործնական օրինակում ամենամեծը եւ վճռորոշը Իլհամ Ալիեւի ներդրումն է: Խոշոր հաշվով, Ալիեւն իր կամքից անկախ ավելի շատ բան է արել Հայաստանում կոռուպցիայի դեմ պայքարում, քան օրինակ Հովիկ Աբրահամյանի գլխավորած հակակոռուպցիոն խորհուրդը, որը հայտնի չէ, թե ինչով է զբաղված:
Եթե լուրջ, Միհրան Պողոսյանի հրաժարականը մեծ պայմանականությամբ է հնարավոր Հայաստանում որակել կոռուպցիայի դեմ իրական պայքար: Ինչ խոսք, մի մասով այն իրական է՝ բարձրաստիճան պաշտոնյան, ով մեղմ ասած զբաղված է բիզնեսով, այլեւս իր պաշտոնին չէ: Պետք է հուսալ, որ ԴԱՀԿ նոր պետը եւս չի լինի բիզնեսմեն: Բայց, դա խնդրի մի մասն է, որովետեւ Միհրան Պողոսյանն իր պաշտոնին չէ, սակայն այդ ընթացքում նրա կուտակած ունեցվածքն էլ իր տեղը չէ՝ այսինքն հանրության եւ պետության հաշվեկշռում:

մանրամասները՝lragir.am-ում: