Հովիկ Աբրահամյանի կողմից կոռուպցիայի դեմ պայքարի մասին հայտարարությունը շոու է, որ նույնիսկ փոքր երեխան կարող է հասկանալ

Վարչապետ Հովիկ Աբրահամյանի կողմից նախորդ շաբաթվա արված կոռուպցիայի դեմ պայքարի մասին հայտարարությունը շոու է, որ նույնիսկ փոքր երեխան կարող է հասկանալ:

Այս մասին Fnews.am-ի հետ զրույցում ասաց «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը:

«Ոնց որ մարդասպանին ասես ինքդ քեզ բացահայտի և ինքնասպանություն գործի. ո՞նց կարող է կոռուպցիայի դեմ պայքարել նա, ով կոռուպցիայի գլխին է կանգնած»,-ասում է Գիմիշյանն ու նկատում, որ արևմուտքը փողեր է հատկացնում կաշառակերներ չինովնիկներին, որ իրենք իրենց դեմ պայքարեն:
«Սա պատահական կաշառակերություն չէ, սա համատարած թալան է»,-ասում է Գիմիշյանն ու ինքն իրեն անմիջապես ուղղում. «Սա հենց գողություն է, որ գողանում են ժողովրդից: Մանկապարտեզի երխան էլ կարող է հասկանալ, որ սա անիմաստ պայքար է՝ կոռուպցիայի դեմ»:

Fnews.am-ի մյուս զրուցակից քաղտեխնոլոգ Արմեն Բադալյանն էլ ծիծաղելի է համարում վարչապետի Հայաստանում մենաշնորհ չլինելու մասին հայտարարությունը: 

Նրա խոսքով՝ Հայաստանում մենաշնորհ կա, ու արդեն էական չէ, թե վարչապետն ինչ է ասում: 

Ըստ մեր զրուցակիցների՝ պայքարել կոռուպցիայի դեմ այնպիսի քաղաքական դաշտում, ինչպիսին Հայաստանում է ձևավորվել՝ բլեֆ է և ինքնախաբեություն:
Սոս Գիմիշյանն, օրինակ վստահեցնում է, որ այսօր թե' իշխանությունը, և թե' ընդդիմությունը, ծանր  իրավիճակում են և այս պահին վստահություն ներշնչող կուսակցություններ չկան:

Քաղաքական դաշտն ամբողջովին իրեն վարկաբեկել է 

«Քաղաքական դաշտն ամբողջովին իրեն վարկաբեկել է, ժողովրդի համբերության լարի վրա է խաղաղում: Դրա համար ասպարեզում եղած ոչ մի քաղաքական ուժ մեծ հույսեր չի ներշնչում: Բոլորին ճանաչում են»,-ասում է Գիմիշյանն, ու ծիծաղելով թվարկում իրենց ընդդիմադիր «հռչակած» կուսակցություններին.«Մեկ Նաիրա Զոհրաբյանն է ընդդիմադիր, մեկ էլ ԲՀԿ-ն է ընդդիմություն: Ընտրությունների ժամանակ նրանք բազար էին տանում իրենց աթոռների համար: Աթոռի կռիվ էր, ոչ թե լուրջ խնդիրներ»,- նկատում է Գիմիշյանը՝ հավելելով, որ ո'չ ԲՀԿ-ն, ո'չ էլ մյուսներն իր համար ընդդիմություն չեն, քանի որ ժողովորդի շահերը չեն հետապնդում:

«Գիմիշյանը հիշեցնում է նաև ԸՕ-ի քննարկումները. գնացին, բազար արեցին, պրծան: Պայմանավորվածություն ձեռք բերվեց, ու հիմա ակնհայտ է ով է մտնելու խորհրդարան: Քամին քաղաքական գործընթացն առաջ տարավ ու հիմա կարելի է դրա մասին չխոսել»,-ընդգծեց նա:

Արմեն Բադալյանն էլ նկատում է, որ պարզելու համար, թե քաղաքական ուժերն այսօր ինչ կշիռ ունեն հանրության շրջանում հարկավոր է սոցիալական հարցումներ անել, սակայն Հայաստանում դա լուրջ պրոբլեմ է, քանի որ իրական սոցիոլոգներ չկան, կան պատվերով նկարչություն անողներ: