Պետք է բավականին կոշտ պայքար սկսվի կառավարական համակարգում գործող չինովնիկական դասի և օլիգարխիայի դեմ

Fnews.am-ի զրուցակիցն է փորձագետ Հարություն Մեսրոբյանը: 

-Պարոն Մեսրոբյան, ըստ Ձեզ մինչ քառօրյա պատերազմն ու դրանից հետո էլ բանակում առկա որոշ բացասական երևույթներ, մասնավորապես սպանության դեպքերն ու կարգապահության հետ կապված խնդիրները ինչո՞վ են պայմանավորված: Որտեղ է գլխավոր բացթողումը, ի՞նչ քայլեր պետք է իրականացվեն նմանօրինակ դեպքերը բացառելու համար: Երեւի թե տեղյակ եք, որ ս.թ-ի մայիսի 25-ին՝ ՀՀ ՊՆ N զորամասում վիճաբանություն էր տեղի ունեցել Հ.Գևորգյանի և նույն զորամասի մեկ այլ ժամկետային զինծառայողի՝ շարքային Գ.Կոսոբոգլյանի միջև։ Վիճաբանությունը վերածվել է ծեծկռտուքի, որի ժամանակ վերջինս սուր կտրող ծակող գործիքով հարվածել է Հ.Գևորգյանի կրծքավանդակի հատվածին: Վերջինս էլ, «Մեղրու ԲԿ» տեղափոխվելու ճանապարհին՝ ժամը 15:55-ի սահմաններում, մահացել էր:

-Աշխարհի բոլոր բանակներում էլ կատարվում են բացասական երևույթներ: Իհարկե կան նման դեպքեր և այստեղ խնդիրը չափի մասին է ու մենք պետք է ձգտենք դա իսպառ վերացնել: Բայց երբեք նման բաներն իսպառ չեն վերացվում ոչ մի բանակում: 

-Բայց խնդիրներ կան ու դրանց վրա աչք փակել չի կարելի: Ի վերջո ի՞նչ պետք է անել, ո՞րն է դրա լուծումը:

-Հայաստանը պետք է դառնա մոբիլիզացիոն միլիտարիստական պետություն: Դա նշանակում է, որ պետք է դրսևորվի քաղաքական կամք որպեսզի խիստ կրճատվի կոռուպցիան, խիստ կրճատվի պետության կառավարման համակարգը: Ես հաշվարկել եմ, որ առնվազն 3 անգամ կարելի է կառուցվածքը պակասեցնել, իսկ 5-10 անգամ էլ չինովնիկների դասը կրճատել. այդ թվում` վերին չինովնիկների… Պետք է ընդունվի բանակի մասին առանձին օրենք, որտեղ հիմք կվերցվի թե Շվեցարիայի, թե Իսրայելի միլիտարիստական մոտեցումը:

Ընդհանրապես պետք է բավականին կոշտ պայքար սկսվի կառավարական համակարգում գործող չինովնիկական դասի և օլիգարխիայի դեմ: Պետք է լինի պայմանական ամնիստիա՝ օլիգարխների նկատմամբ: Այսինքն` գնահատվում է, թե դրանց գործունեության ընթացքում ինչ կարգի գումարներից է զրկվել Հայաստանը, դնել ժամանակացույց, էդ պահից սկսած իրենք պետք է լրիվ դուրս գան ստվերից, մուծեն բոլոր ընթացիկ հարկերը, բայց արդեն ժամանակացույցի օրոք, որից հետո իրենց բիզնեսը պետք լեգալիզացվի: Եթե սա իրականացվեց լավ, իսկ եթե ոչ` նրանց հետ պետք է խոսել օերնքի ամբողջ խստությամբ:

-Որքանո՞վ կարող է նպաստել այդ գործընթացին վարչապետի հայտարարած կոռուպցիայի դեմ անողոք պայքարը:

-Ասել եմ ու կասեմ. կոռուպցիայի դեմ պայքարը Հայասատնում դարձել է կրկներգ: Հիմա էլ այդ հայտարարությունը կապված է նրա հետ, որ քառօրյա պատերազմից հետո հայությունը, առաջին անգամ երևի իր պատմության մեջ, անհանդուրժողականություն է ցուցաբերում: Քառօրյան ցույց տվեց, որ ազգը միահամուռ է: Նրա անհանդուրժողականությունը տարածվում է բոլոր տեսակի թալանչիների վրա: Եվ իշխանությունը պետք է գնա կոնկրետ կտրուկ քայլերի: