Արցախի ՊԲ­-ի կողմից գերեվարվածի մայրը պնդում է, որ իր որդին զինծառայող էր. բացահայտվում է Ադրբեջանի ՊՆ­-ի սուտը (Video)

Armenpress.am-ը գրում է.

Լեռնային Ղարաբաղի Հանրապետության պաշտպանության բանակի կողմից գերեվարված ադրբեջանցի զինծառայողի մայրը հերքել է Ադրբեջանի պաշտպանության նախարարության հայտարարությունն այն մասին, որ գերի ընկածն Ադրբեջանի բանակի զինծառայող չէ:

Այս մասին տեսանյութ է տարածել Istipress.com-ը:

Տեսանյութում մայրը ներկայացրել է, որ գերեվարված Էլնուր Հուսեյնզադեն ռազմական ծառայության ավարտից չորս ամիս հետո վերադարձել է բանակ պայմանագրային զինծառայողի կարգավիճակով:

Վերջին անգամ նա տանն է եղել դիվերսիոն փորձի նախօրեի երեկոյան:

1. - (մայրը). Զինվորական ծառայությունն ավարտելուց հետո վերադարձել էր տուն և չէր աշխատում: Չորս ամիս է, ինչ կամավոր ընդունվել է ծառայության: Երեկ գիշերը (01.02.2017թ.) զարգահարել են ինձ զորամասից ժամը 01:30 սահմաններում և ասել, որ զորամաս չի եկել: Ես էլ ասացի, որ եկել է զորամաս, ոնց թե չի եկել: Այնուհետև ասացին, չէ չի եկել: Հետո էլ, թե գերի է ընկել, ես էլ ասացի որտեղից գիտես դու դա: Ասաց, որ համացանցում է գրված: Ես էլ ասացի համացանցում գրված է, քո զինվորն է, քո մոտ է լինում, դու պետք է իմանաս ուր է գնացել, որտեղից է գալիս: Գիշերվանից որևէ նորություն չկա: 

2. - (լրագրող). Իսկ հայրը որտեղ է:
1. – Հայրը գնացել է զորամաս:
3. – (հավանական է տատիկը) երեկ (01.02.2017թ.) ժամը տասին ասաց գնում են զորամաս: 
4. – (կողքից խոսացող կնոջ ձայն). երեկ այստեղ է եղել, գիշերը մնացել է, իսկ հաջորդ օրը առավոտյան գնացել: 
1. - Երեկ չէ անցած օրը երեկոյան եկավ մեր տուն գիշերը մնաց, և առավոտյան գնաց զորամաս:

Փետրվարի 1-ին ժամը 15.00-ի սահմաններում ղարաբաղա-ադրբեջանական հակամարտ զորքերի շփման գծի հյուսիսային (Թալիշ) ուղղությամբ հակառակորդը, օգտագործելով եղանակային մառախլապատ պայմանները, ձեռնարկել է հետախուզադիվերսիոն ներթափանցման փորձ: ՊԲ առաջապահ ուժերը, ժամանակին հավաստանշելով ադրբեջանական հատուկ ջոկատայինների առաջխաղացումը, դիմել են կանխարգելիչ գործողությունների և կորուստներ պատճառելով հետ շպրտել: Կազմակերպված հակադիվերսիոն գործողության արդյունքում՝ առաջնագիծը պաշտպանող հայկական ուժերին հաջողվել է գերեվարել ադրբեջանական բանակի զինծառայող, 1995թ. Բարդա քաղաքում ծնված Էլնուր Հյուսեին Զադեին: Ըստ հավաստի տվյալների՝ հակառակորդը տվել է նաև առնվազն 1 վիրավոր, որն, ի դեպ, պաշտոնապես հաստատվել է Ադրբեջանի ՊՆ-ի կողմից այսօր տարածված հաղորդագրությամբ: