Փաշինյանի՝ պաշտոնյաների ունեցվածքի ուսումնասիրության նախագիծը ԱԺ հանձնաժողովում հավանության չարժանացավ

ԱԺ «Հայ ազգային կոնգրես» խմբակցության պատգամավոր Նիկոլ Փաշինյանի ներկայացրած «Բարձրաստիճան պաշտոնատար անձանց և նրանց հետ փոխկապակցված անձանց եկամուտների ձևավորման աղբյուրները և գույքային վիճակն ուսումնասիրող ՀՀ Ազգային ժողովի ժամանակավոր հանձնաժողով ստեղծելու մասին» նախագիծը 5 դեմ և 1 կողմ ձայներով չստացավ հանձնաժողովի դրական եզրակացությունը:

Հանձնաժողովի նախագահ Հովհաննես Սահակյանը նշեց, որ այս նախագիծը քաղաքական օրակարգ մտցնելու հարց է, և իրենք չեն պատրաստվում «Ելք» դաշինքի նախընտրական ծրագրի մեջ որևէ կետ ավելացնել: Նա նշեց, որ ապօրինի հարստացման հետ կապված այդ նույն անունները և տերմինները, նույն օրակարգը վաղուց Նիկոլ Փաշինյանը մտցրել է ԱԺ և ամբողջ ընթացքում պահել է:

«Մեր գործընկերների հետ, երբ քննարկում էինք այս նախագիծը, ես ասացի, որ կարող եմ գրել և ստորագրել, որ այս և այս մարդկանց անունները և տեքստը նույնը լինելու է, գնալու է առաջ: Այնպես որ, ես այստեղ կարծես թե շահած կողմ եմ, գրազը կրել եմ, որովհետև այն, ինչ կանխատեսում էինք, թե ինչ պետք է ասեիք, ում անունները տայիք, ինչ տոնայնությամբ, դա այդպես էլ եղավ»,-ասաց նա և նշեց, որ իր անձնական տեսակետն է, որ այս նախագիծն ուղղակի ընդամենը նախընտրական օրակարգ լցնելու նախագիծ է:

Նիկոլ Փաշինյանն արձագանքելով գրազին, ասաց, որ Սահակյանը, փաստորեն լինելով «Հանրապետական» խմբակցության անդամ, ներսից գիտի, թե թալանի մասին խոսելիս ում անուններն են նշվելու: 

«Այսինքն` գիտեք Հայաստանի Հանրապետությանը 25 տարվա ընթացքում թալանածների թոփ տասնյակը: Մենք ցանկանում ենք տապալել ՀՀ-ում թալանի շարունակության գործընթացը և հետևողականորեն այս հարցը մտցնելու ենք ՀՀ քաղաքական օրակարգ»,-իր եզրափակիչ ելույթում ասաց նա: