Ամեն օր չես տեսնում երեխայի աճը, բայց երբ բացում ես ընտանեկան ալբոմը և թերթում այն, տեսնում ես ինչ աճ է ապրել երեխան

Եվրոպական միության կողմից ֆինանսավորվող «Արդարադատության մոնիթորինգ» ծրագրի թիմի արդյունքների ներկայացմանը ՀՀ արդարադատության նախարար Դավիթ Հարությունյանն այսօր խոսեց դատական իշխանության կառուցվածքի ու աշխատաոճի մասին։ Ըստ նրա`ոլորտի այս հարցերը մշտապես կառավարության ուշադրության կենտրոնում են:

«Երբևէ չես կարող վերցնել մի մոդել, որին պատրաստ չես, պետք է մոտենալ քայլ առ քայլ: 2005 թվականի մոդելը էապես առաջընթաց էր արձանագրում 1995 թվականի Սահմանադրության համար և տվեց իր պտուղները: Սակայն, ինչպես բոլոր մոդելները, դրանք սկզբում դառնում են խթան, հետո կաշկանդող: Դրա համար, երբ փոխվեց Սահմանադրությունը, հատուկ ուշադրություն դարձվեց նոր մոդելներին, որոնց պատրաստ ենք»,-ասաց նա:

Խոսելով փաստերի հիման վրա մշակված գործիքների մասին, Արդարադատության նախարարն առաջնահերթ կարևորեց փորձագիտական գիտելիքները, ապա հանրային ընկալումը և նշեց, որ կարող ես ունենալ ամենաարդար դատարան, սակայն եթե հանրային ընկալումն այդպիսին չլինի, ապա դա կարժեզրկվի: Հետազոտության երրորդ պտուղը նա համարեց հանրային կարծիքն ամփոփելու մեթոդաբանությունը:

«Ամեն օր չես տեսնում երեխայի աճը, բայց երբ բացում ես ընտանեկան ալբոմը և թերթում այն, տեսնում ես ինչ աճ է ապրել երեխան: Նման բան է մեզ պետք, և մեթոդաբանությունը հնարավորություն է տալիս թերթել ընտանեկան ալբոմը և տեսնել` կա՞ զարգացում, թե՞ ոչ»,-ասաց նա: