Ադրբեջանի ծրագրերը տապալվեցին՝ հատկապես եվրոպական կառույցներում և միջազգային հարթակներում․ Դավիթ Բաբայան

Արցախի նախագահի մամուլի խոսնակ Դավիթ Բաբայանը կարծում է՝ 2017-ը համեմատաբար ավելի հանգիստ տարի է եղել և՛ Արցախի, և' թե ընդհանրապես, ամբողջ հայության համար։ Այս մասին վերջինս նշեց Fnews.am-ի հետ զրույցում։

«Իհարկե, անցնող տարին այսպես ասած՝ իր մեջ կրում էր Ապրիլյան պատերազմի ազդեցությունը, որովհետև մենք այս տարի նշեցինք մեր հերոսների մահվան տարելիցը։ Մենք կրում էինք կորստի ցավը, և, միաժամանակ, հպարտ էինք։ Ընդհանուր առմամբ, 2017 թվականը եղել է արարման, քրտնաջան աշխատանքների տարի։
Իրականացվել են լայնածավալ աշխատանքներ, ծրագրեր՝ սահմանն ամրապնդելու համար․ մենք արդեն ունենք շոշափելի առաջընթաց։ Բարեբախտաբար, այս տարի համեմատաբար ավելի քիչ զոհեր ունեցանք։ Դա սահմանում իրականացված աշխատանքների վառ վկայությունն է։ Մեծ աշխատանքներ են տարել նաև սոցիալ-տնտեսական, առողջապահական ոլորտներում։ Եղել են մեծ ծրագրեր, որոնք կյանքի են կոչվել ենթակառուցվածքների ոլորտում․ ամենախոշորը եղել է Վարդենիս-Մարտակերտ մայրուղու շահագործումը։ Էներգետիկայի, սպորտի, մշակույթի ոլորտներում ևս ունեցել ենք մեծ ձեռքբերումներ, և  առհասարակ, գրեթե բոլոր ոլորտներում առաջընթաց ենք ունեցել։ Միաժամանակ, մենք դեռ շատ անելիքներ ունենք։Պետք է շատ աշխատենք՝ այդ խնդիրները լուծելու համար»,- ասաց Դավիթ Բաբայանը։

Վերջինս շեշտեց՝ Արցախը 2017-ին ձեռքբերումներ է ունեցել նաև արտաքին քաղաքականության ասպարեզում։

«Արցախը ճանաչվեց ԱՄՆ-ի Միչիգան նահանգի կողմից.կնքվեցին մի շարք քույր քաղաքների պայմանագրեր, մասնավորապես՝ Ֆրանսիայի քաղաքների հետ․ սա էլ է շատ կարևոր։ Մենք տեսանք, որ Ադրբեջանի բազմաթիվ ծրագրեր տապալվեցին՝ հատկապես եվրոպական կառույցներում և միջազգային հարթակներում։ Այսինքն՝ ընդհանուր առմամբ, 2017-ը արարման տարի է եղել։ Նույն ոճով, նույն համառությամբ պետք է ապրել, արարել նաև 2018 թվականին, ինչը յուրահատուկ տարի է լինելու՝ հաշվի առնելով մի շարք քաղաքական կարևոր զարգացումներ և տոներ, օրինակ՝ մենք պետք է տոնենք հայկական Առաջին Հանրապետության 100-ամյակը, 1918 թվականի Մայիսյան փառավոր հաղթանակների 100-ամյակը, Արցախյան հիմնախնդրի 100-ամյակն է, այսինքն՝ այս հիմնախնդիրը առաջ է եկել 1918 թվականին։ Կնշենք նաև Արցախյան շարժման վերջին փուլի՝ 1988-ի շարժման 30-ամյակը։
2018-ին տոներ կլինեն նաև Ադրբեջանում․ այսպես կոչված՝ Առաջին հանրապետության այդ արհեստածին միավորման ձևավորումն են նշելու, ինչն իրենց համար շահարկումների առարկա է՝ հաշվի առնելով այն, որ եկող տարի իրենց մոտ նաև ընտրություններ պիտի տեղի ունենան, կսկսվեն հակահայկական նոր կրքեր, նոր ալիք․․․ Դրա համար մենք պիտի ավելի զգոն ու միասնական  լինենք, որպեսզի կարողանանք իրականացնել մեր առջև դրված բոլոր խնդիրները», - եզրափակեց Դավիթ Բաբայանը։

Հ. Աբրահամյան