Ինչ կապ է ունեցել Սամվել Բաբայանը «Իգլա»-ի գործով Վրաստանից Հայաստան տեղափոխված Աղվանյանի հետ. 1in.am

ԼՂՀ պաշտպանության բանակի նախկին հրամանատար Սամվել Բաբայանի փաստաբան Ավետիս Քալաշյանը դեկտեմբերի 25-ին վերաքննիչ բողոք է ներկայացրել՝ վերանայելու Կենտրոն և Նորք-Մարաշ վարչական շրջանների ընդհանուր իրավասության դատարանի վճիռը:

Սամվել Բաբայանի շահերի պաշտպան Ավետիս Քալաշյանն «Առաջին լրատվական»-ի հետ զրույցում ասաց, որ միայն աշխատանքային օրերը վերսկսելուց հետո պարզ կլինի՝ վարույթ ընդունվե՞լ է բողոքը, թե՞ ոչ։

Քալաշյանից հետաքրքրվեցինք նաև, թե իր կարծիքով՝ դեկտեմբերի 27-ին քրեական պատասխանատվության ենթարկելու նպատակով Վրաստանից Հայաստան տեղափոխած «Իգլա»-ի մաքսանենգության և դրա ապօրինի շրջանառության համար հետախուզման մեջ գտնվող Ռոբերտ Աղվանյանի հայտնաբերումն ու տեղափոխումը Հայաստան ինչ-որ կերպ կազդի՞ գործի ընթացքի վրա, Քալաշյանը պատասխանեց. «Որևէ ազդեցություն ունենալ չի կարող, քանի որ Ռոբերտ Աղվանյանը և Սամվել Բաբայանը երբևէ որևէ առնչություն չեն ունեցել, իրար չեն ճանաչել։ Ես չգիտեմ՝ ինչ է արել Աղվանյանը՝ տեղափոխե՞լ է հրթիռը Հայաստան, թե՞ այն եղել է այստեղ։ Չգիտեմ։ Լավ է, որ իրեն բերել են։ Հենց նա էլ այդ ամեն ինչի մասին մանրամասն կասի, կպատմի»,- ասաց Քալաշյանը՝ հավելելով, որ Աղվանյանի տեղափոխումը որևէ ազդեցություն չի ունենա գործի ելքի վրա, քանի որ Սամվել Բաբայանի հետ բացարձակ կապ չի եղել, գործում նման որևէ ապացույց չկա և, Քալաշյանի խոսքով, չէր էլ կարող լինել։

Հիշեցնենք, որ Կենտրոն և Նորք-Մարաշ վարչական շրջանների առաջին ատյանի դատարանը հաստատված համարելով ռազմամթերքի ապօրինի շրջանառության և փողերի լվացման մեղադրանքը՝ Սամվել Բաբայանին դատապարտեց 6 տարվա ազատազրկման: Մեղադրող դատախազը դատարանին միջնորդել էր նրան դատապարտել 7 տարվա ազատազրկման։ Սամվել Բաբայանի փաստաբանը կարծում է, որ մեղադրանքն անհիմն է, և Սամվել Բաբայանը պետք է արդարացվի։

Լուսանկարը՝ Photolure-ի

1in.am