«Դուք գիծ անցաք, իշխանությունները կարող են և պարտվել, պետությունը՝ ոչ». Արարատ Միրզոյանը՝ պաշտոնյաների ձայնագրության մասին

ՀՀ առաջին փոխվարչապետ Արարատ Միրզոյանը ֆեյսբուքյան իր էջում անդրադարձել է ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի հեռախոսազրույցի գաղտնալսմանն ու հրապարակմանը:

«Դուք գիծ անցաք։ Իշխանությունների դեմ քաղաքական պայքարի և հակապետական գործունեության միջև նուրբ սահմանը։

Դե ինչ, իշխանությունները կարող են և պարտվել, պետությունը՝ ոչ»,-գրել է Միրզոյանը։

Հիշեցնենք, որ երեկ համացանցում հրապարակվել էր ԱԱԾ տնօրենի և ՀՔԾ ղեկավարի հեռախոսազրույցը, որը տեղի էր ունեցել ՀՀ երկրորդ նախագահի կալանավորման օրը:

Հեռախոսազրույցի ընթացքում պաշտոնյաներն անդրադարձել էին Ռոբերտ Քոչարյանի և Յուրի Խաչատուրովի կալանավորման հիմքերին:

Արթուր Վանեցյանն ու Սասուն Խաչատրյանը երեկ հանդես են եկել մամուլի ասուլիսով՝ պարզաբանելով տեղի ունեցածը:

Ավելի ուշ, Երևանի ավագանու ընտրությանը մասնակցող «Իմ քայլը» դաշինքի հանրահավաքի ընթացքում սկանդալին ևս մեկ անգամ անդրադարձել էր ՀՀ վարչապետ Նիկոլ Փաշինյանը:

Նա, մասնավորապես, ԱԱԾ-ին և ոստիկանությանը հրահանգ էր տվել:

«Հրահանգում եմ այս պահից իրականացնել «ռեյդեր»՝ բարձրաստիճան պաշտոնյաների թիկնազորներին պառկեցնել ասֆալտներին»: