«Ժառանգատուի պարտատերն իրավունք ունի ժառանգության բացման օրվանից հետո, վեց ամսվա ընթացքում ներկայացնել իր պահանջները».Լիանա Բալյան

ՓԱՍՏԱԲԱՆԻ ԱՆԿՅՈւՆ

Հարցին պատասխանել է ՀՀ Փաստաբանների Պալատի անդամ, փաստաբան Լիանա Բալյանը

-Երեւան քաղաքի բնակիչ Ա. Մուրադյան 

Հարց.

Ինձ պարտք ունեցող քաղաքացին մահացել է և ես չգիտեմ ինչ անեմ: Նա ինձ պարտք է խոշոր գումար, այսինքն ես նրա մահից հետո կորցրեցի գումարներս: Ո՞ւմ կարող եմ դիմել, դիմեմ, խնդրում եմ օգնեք:

ՊԱՏԱՍԽԱՆ 

Հարգելի քաղաքացի, Դուք Ձեր գույքային պահանջները կարող եք ներկայացնել ժառանգության բացման պահից սկսած: ՀՀ Քաղաքացիական օրենսդրությունը սահմանում է, որ ժառանգատուի պարտատերն իրավունք ունի ժառանգության բացման օրվանից հետո վեց ամսվա ընթացքում ներկայացնել իրենց պահանջները (ՀՀ քաղ. օր. 1243 հոդվ.): Նշենք, որ այդ ժամկետի բացթողնումը հանգեցնում է Ձեր իրավունքների կորստի, այսինքն այդ վեցամսյա ժամկետը չպետք է բաց թողնեք:
Քանի որ ժառանգման կարգով փոխանցվում են ժառանգատուի ոչ միայն իրավունքները, այլև պարտականությունները, ապա պարտատիրոջ պահանջները ժամանակին ներկայացնելն ունի կարևոր նշանակություն: Տվյալ դեպքում Ձեր կողմից ներկայացված պահանջները կդիտվեն որպես պարտապանի պարտավորություն և կմտնեն ժառանգության զանգվածի մեջ: Պահանջները, մինչև ժառանգների կողմից ժառանգության իրավունքի վկայագիր ստանալը, կարող են ներկայացվել ժառանգությունն ընդունած ժառանգներին՝ կամ կտակակատարին, իսկ նշված անձանց բացակայության դեպքում՝ ժառանգության բացման վայրի նոտարին:

Հ.Գ 

Հարգելի ընթերցողներ մեր էլ փոստին՝ [email protected] հասցեով կարող եք ուղարկել Ձեզ հետաքրող հարցերը, եւ կարճ ժամանակում  ստանալ  Ձեզ հուզող հարցերի պատասխանները: