«Հայտնվել ենք աշխարհաքաղաքական տարբեր երկրների շահերի կիզակետում, եւ մենք պետք է շատ խոհեմ լինենք» Արցախի ԱԺ նախագահի տեղակալ

Հայտնի է, որ դեռեւս նոյեմբերի 8-ին Աստանայում տեղի ունեցած ՀԱՊԿ գագաթաժողովի արդյունքներով Ղազախստանի նախագահ Նուրսուլթան Նազարբաևը նշել էր, որ «գլխավոր քարտուղար պետք է դառնա Բելառուսի ներկայացուցիչը, քանի որ կանոնադրությամբ ռուսական այբբենական կարգով Բելառուսն է հաջորդում Հայաստանին»։ Մինչդեռ, նկատենք, որ Հայաստանը մինչև 2020 թվականը հնարավորություն ունի զբաղեցնել ՀԱՊԿ գլխավոր քարտուղարի պաշտոնը: ՀԱՊԿ գլխավոր քարտուղարի նշանակման վերաբերյալ վերջնական որոշումը կկայացվի դեկտեմբերի 6-ին՝ Սանկտ Պետերբուրգում:
Սակայն այսօր արդեն հայտնի դարձավ, որ ՀՀ նախագահ Արմեն Սարգսյանը հրամանագիր է ստորագրել, Վիկտոր Բիյագովին Հավաքական անվտանգության պայմանագրի կազմակերպությունում Հայաստանի Հանրապետության մշտական և լիազոր ներկայացուցիչ նշանակելու մասին:

Ինչեւէ, դեկեմբերի 6-ի հետ կապված ինտրինգը շարունակում է լարված պահել արտաքին քաղաքական դաշտը: Իսկ թե աշխարհաքաղաքական առումով  ի՞նչ նոր զարգացումների ականատես կլինենք,  եւ  Տարածաշրջանում քաղաքական ինչպիսի՞ օրակարգ կարող է ձեւավորվել առաջիկայում, Fnews.am-ը զրուցեց Ացախի հանրապետության ԱԺ նախագահի տեղակալ ՎԱՀՐԱՄ ԲԱԼԱՅԱՆԻ հետ, ով անդրադառնալով նախ ՀԱՊԿ գլխավոր քարտուղարի պաշտոնին նշեց.

-Գաղտնիք չէ, որ մինչ Խաչատուրովի նշանակվելն էլ, ընդհանուր առմամբ ՀԱՊԿ երկրները` մասնավորապես Բելառուսը, Ղազախստանը, այսպես ասած, հակահայկական որոշակի դիրքորոշումներ ունեին որդեգրած: Նրանք, ավելի  շատ օժանդակում են Ադրբեջանին, ինչը չափազանց տեսանելի է: Եվ հենց ստեղծվեց այս խառը իրավիճակը, բնականաբար, նրանք մտածեցին, որ հնարավոր է ՀՀ-ին դուրս մղել ՀԱՊԿ-ում ներկայացուցիչ ունենալու  հնարավորությունից: Իրենց համար այսօր պարարտ հող է նախապատրաստված,  եւ կարծում եմ, որ նրանք այդ ճանապարհով էլ կգնան: Բայց մենք որպես երկիր՝ պետք է պայքարենք մեր իրավունքները պաշտպանելու համար: Ի վերջո, այս կառույցը կարեւոր կառույց է. թե՛ ՀՀ անվտանգությունը պահելու տեսանկյունից, եւ թե ինչու ոչ ` ինչ-որ չափով Արցախի անվտանգության հետ կապված խնդիրների առումով: Կարծում եմ, դեկտեմբերի 6-ին Պետերբուրգում կայանալիք հանդիպմանը, որեւէ համաձայնություն չի լինի, որովհետեւ ինչպես ասում են. ցանկությունները եւ իրավիճակը տարբեր բաներ են:

-Ամեն դեպքում ներկայիս գործընթացները, ի՞նչպես կարող են անդրադառնալ աշխարհաքաղաքական զարգացումների վրա:

-Իհարկե մեր կարգավիճակը եւ ընդհանուր առմամբ ՀՀ անվտանգության հարցերը, առանձին քննարկման առարկա չենք կարող դարձնել: Եվ այո, դա աշխարհաքաղաքական զարգացումների խորապատկերի վրա պետք է նայվի: Եվ այս տեսանկյունից, բնականաբար. թե՛ Միլսի, թե՛ Բոլթոնի հայտարարությունները, մոտեցումները պետք է դիտարկել ՌԴ-ԱՄՆ հարաբերությունների խորապատկերի վրա: Որովհետեւ այս երկու գերտերությունները տարածաշրջանում փորձում են իրենց ազդեցությունը մեծացնել: Եվ այս տեսանկյունից,  իսկապես մենք հայտնվել ենք աշխարհաքաղաքական տարբեր երկրների շահերի կիզակետում,  եւ մենք պետք է շատ խոհեմ լինենք:

-Պարոն Բալայան, տեղյակ ե՞ք, որ ՀՀ-ում սոցցանցերի մակարդակով վերջին շրջանում հայտնվել են անձիք, ովքեր ադբեջանցիների հետ ընկերություն անելու կոչերով են հանդես գալիս: Որքանո՞վ է ընկալելի այս իրավիճակը, հաշվի առնելով, որ ապրիլյան պատերազմի վերքերը դեռ չափազանց թարմ են:

-Իսկապես շատ տեղին հարց եք բարձացնում. ցավալի է, որ մեր մոտ նման մտածելակերպով մարդիկ կան: Բայց միեւնույն ժամանակ զարմանալի չէ, որովհետեւ տարբեր ժամանակահատվածներում նման իրավիճակների հանդիպել ենք: Երբ մեզ փորձել են ներսից քանդել: Ես կարծում եմ, որ նման մտածելակերպով մարդիկ ծառայում են դրսի շահերին: Ինչը դատապարտելի է, եւ անընդունելի:

-Օգտվելով առիթից, կխնդրեի ներկայացնեիք նաեւ ներկայիս սահմանային իրավիճակը:

-Կրակոցներ կան, բայց համեմատաբար, կարելի է ասել հանգիստ վիճակ է: Բոլոր դեպքերում մենք միշտ զգոն ենք, եւ պատրաստ ամեն վարկյան մեր հողը պաշտպանելու:

Fnews.am

Լուրեր Հայաստանից