«Ասում ա` ես եմ ասողը ստեղի, Դուք էլ, Ձեր կառավարությունն էլ, Ձեր պատգամավորներն էլ»

Այսօր, Newsmedia-ին էր ահազանգել Գեղարքունիքի մարզի բնակիչ` Ռուբեն Գրիգորյանը, ով աշխատում էր Վարդենիսի Սոթքի հանքում:  Ում օրերս,  առանց պատճառի.ընդամենը ծանուցագրով  տեղեկացրել են, որ այլեւս ազատված է աշխատանքից:
Ըստ քաղաքացու.

-Ֆիզիկապես ծանր աշխատանքով եմ աշխատում, մեր տնօրենը` էն կարգի բեսպրեդել ա անում, որ նկարագրելու չի: Ոչ մի պայման չի ստեղծում աշխատողի համար, բայց եթե աշխատողը մի փոքր թերանա` կարող է զրկվել աշխատավարձից, աշխատանքից: Մարդու իրավունքները ահավոր ձեւով խախտվում են Սոթքի հանքում` տնօրենի գլխավորությամբ:

-Ո՞վ է տնօրենը:

-Միդոյան Արայիկը, հենց ինքն է բեսպրեդելը մտցրել հանքում: Ոչ ոքի չի լսում, ոչ մեկին չի ենթարկվում: Ասում է` ես եմ ասողը ստեղի. Դուք էլ, Ձեր կառավարությունն էլ, Ձեր պատգամավորներն էլ:

-Իսկ դիմե՞լ եք ինչ-որ մեկին այդ հարցով:

-Մենակ Մարդու իրավունքների պաշտպանին `երեկ, իրենք էլ ասում են մասնավոր սեկտոր ա, մենք իրանց հետ կապ չունենք: Այսինքն՝ ՄԻՊ-ն էլ ա մերժել:

-Իսկ Կառավարությանը, պատգամավորներին դիմել ե՞ք:

-Չէ, դեռ ոչ մեկին չեմ կարողացել դիմել: Մեր մարզի պատգամավորներին էլ իմաստ չունի դիմեմ, որովհետեւ հենա ասում ա` Դուք էլ Ձեր պատգամավորներն էլ:

-Լավ, չասացիք, Ձեզ ինչի համար են հեռացրել:

-Պատճառը ես էլ եմ ուզում հասկանամ:

-Որպես ի՞նչ էիք աշխատում:

-Փականագործ էի:

- Երբվանի՞ց:

-2013թվականից: Ինձ տեղյակ էլ չեն պահել, որ ազատում են: Ուղղակի թուղթ են ուղարկել, որ ես ազատված եմ: Էսքան բան: Ես վեց հոգանոց ընտանիք եմ պահում, երկու անչափահաս երեխաների տեր եմ, ընտանիքի միակ կերակրողն եմ: Հիմա չգիտեմ՝ ինչ է լինելու մեր վիճակը: