«Ով էլ լինի իշխանության գլխին` թե Արցախում, թե՛ Հայաստանում. պարտավոր են մեկը մյուսի նկատմամբ եղբայրական հարաբերություն ունենալ».ԴԱՎԻԹ ԲԱԲԱՅԱՆ

Հայտնի է, որ մայիսի 20-24-ը Ադրբեջանում մեկնարկել է խոշոր զորավարժություն, որին, ըստ ադրբեջանական տվյալների, մասնակցելու է մոտ 10 հազար զինծառայող, 150 միավոր տանկ և այլ զրահատեխնիկա, մինչև 200 միավոր հրթիռահրետանային տեխնիկա, ՀԿՌՀ–ներ ու ականանետեր և մինչև 35 միավոր ինքնաթիռ ու ուղղաթիռներ: Հիշեցնենք, որ ըստ Ադրբեջանի ՊՆ-ի՝ զորավարժության հայտարարված նպատակը, գիշերային ժամերին պայմանական «թշնամու» հարձակմանը տարբեր ուղղություններով հակահարվածների ու հակահարձակումների խաղարկումն է։

Սրանով պայմանավորված, եւ առհասարակ հնարավո՞ր է թշնամու կողմից հանկարծակի լայնամաշտաբ ռազմական գործողությունների վերսկսում, այս եւ մի շարք այլ հարցերի պատասխաններ ստանալու ակնկալիքով NewsMedia.am-ը դիմեց Արցախի հանրապետության նախագահի խորհրդական Դավիթ Բաբայանին, ով անդրադառնալով թշնամու կողմից ռազմական գործողությունների վերսկսման վտանգին, նախ նկատեց.

-Մենք պատերազմի պետք է պատրաստ լինենք ամեն պահի, անկախ նրանից մեծ է վտանգը, թե ոչ: Սա գրված եւ չգրված օրենք է: Ինչքան պատրաստ լինենք՝ այնքան ավելի հավանականությունը քիչ է լինելու: Հետեւաբար միշտ պետք է լինենք պատրաստ, որպեսզի հակառակորդը չդիմի արկածախնդրության:

-Պարոն Բաբայան, լրատվամիջոցներից մեկին տված հարցազրույցում Դուք մասնավորապես ասել եք. «Մենք, առհասարակ, վտանգ ենք զգում բոլոր նրանցից, ովքեր պատրաստ են հողեր հանձնել»: Կմանրամասնե՞ք` կոնկրետ ով, կամ ովքեր են այդ հայտարարության հասցեատերերը:

-Բոլորին, տարբեր մարդկանց, ովքեր միշտ, անընդհատ խոսում են այդ հարցերի մասին: Մենք միշտ պետք է այնպես անենք, որպեսզի նման գաղափարներ կրող մարդիկ՝ երբեւիցէ չկարողանան իրենց նենգ գաղափարները իրականացնել: Դա պահանջում է համառ աշխատանք. իրավական, քաղաքական, հոգեբանական բոլոր հարթություններում:

-Պարոն Բաբայան, անշուշտ, Դուք եւս նկատել եք, որ վերջին շրջանում պարբերաբար թե՛ ՀՀ-ի, եւ թե՛ Արցախի կողմից հայտնվում են որոշ անձիք, ովքեր կարծես ջանք չեն խնայում տարանջատում մտցնելու հայաստանցի-արցախցի եզրույթի մեջ: Ի՞նչ կասեք, սրա վերաբերյալ:

-Ցավոք, հենց նման մարդիկ իրենց պահվածքով «ապամոնտաժում են» մեր պետականությունը: Որովհետե եթե նման գաղափարներ են առաջ բերվում ինչպես օրինակ` հայաստանցի-ղարաբաղցի, ղարաբաղցիք հայ չեն, ուրեմն ինչի համար պայքարենք Ղարաբաղի համար եւ այլն: Հետեւաբար մենք նման գաղափարներ կրող մարդկանցից պետք է հեռու մնանք, իսկ, որ նման մարդիկ կան`դա փաստ է: Ինչքան էլ ամոթալի լինի. տհաճ լինի, բայց այդպիսի մարդիկ այնուամենայնիվ` քիչ, բայց կան:

- Ինչո՞վ եք պայմանավորում, որ այ հենց հիմա սկսեցին նման մարդիկ, այսպես ասած «ջրի երես» դուրս գալ:

- Նման մարդիկ ընդհանրապես ե՞րբ են դուրս են գալիս ջրի երես, երբ տեղի է ունենում ինչ-որ գործընթացներ, լարվածություն է ստեղծվում: Նման մարդիկ պատեհ առիթը բաց չեն թողնում՝ պարբերաբար ջրի երես դուրս գալու. եւ հենց սա է խնդիրը: Իսկ որպեսզի նման գաղափարները չեզոքանան՝ անհրաժեշտ է համապատասխան գաղափարախոսական, լրատվական, դաստիարակչական աշխատանքներ տանել:
Կարծում եմ, որ եթե այս բոլոր ուղղություններով աշխատանք տարվի, ըստ իս նման գաղափարների թիվը կտրուկ նվազի, կարող է նույնիսկ նման գաղափարներ կրող մարդիկ վերանան, որովհետեւ կան մարդիկ, ովքեր չհասկանալով նման բաներ են ասում, եւ երբ բացատրում ես` հասկանում են, որ սխալ են:

-Եթե ամփոփենք մեր զրույցը, ինչպիսի՞ն են այսօր ՀՀ-ի եւ Արցախի հարաբերությունները, հաշվի առնելով որ համացանցում վերջին օրերին շատ են նշվում, որ հարաբերությունները լարված են եւ այլն:

-Եթե հանկարծ մի օր ՀՀ-ի եւ Արցախի հարաբերությունները սրվեն` դա կլինի ամոթալի խայտառակություն, վերջ ի վերջո կլինի մեր պետականության համար մեծ հարված: Ինչու պետք է մեր հարաբերությունները սրվեն, այո երկու պետություն ենք` այդպես է ստացվել, բայց մի հայրենիք ենք: Եվ այն բոլոր մարդիկ, ովքեր գիտակցաբար փորձում են դա անել` շատ վատ է: Մեր հարաբերությունները չեն կարող լինել վատ, որովհետեւ սա անթույլատրելի է: Ես բազմիցս նշել եմ, բայց նորից կրկնում եմ՝ անկախ ամեն ինչից. ով էլ լինի իշխանության գլխին` թե՛ Արցախում, թե՛ Հայաստանում, պարտավոր են մեկը մյուսի նկատմամբ եղբայրական հարաբերություն ունենալ: Որովհետեւ սա քմահաճույք չէ, սա պետության հրամայական է: Իսկ ժողովրդի մասին առհասարակ խնդիր չկա, մենք միշտ միասնական ենք` անկասկած:

Զրույցը՝ ՆՈՆԱ   ԱԴԱՄՅԱՆԻ