«Օլիգարխների՝ իշխանությունում հայտնվելու ուղիները խմբագրվեցին միայն սելեկտիվ կերպով». Հրանուշ Խառատյան

«Մենք այլևս հեղափոխական կառավարությամբ չենք ապրում, գործադիր և օրենսդիր իշխանությունները ոչ այնքան հեղափոխական քայլերով են գնում, որքան փնտրում են հնարավոր փոխզիջումներով կայունանալու ուղին»,- «Արմնյուզ» հեռուստաընկերության եթերում ասել է ազգագրագետ Հրանուշ Խառատյանը:

Նրա խոսքով՝ այսօր կա և՛ բուն հեղափոխական գաղափարների ընթացք, և՛ չափից դուրս երկար փնտրտուք, և՛ սուբյեկտիվ մոտեցում, որը հեղափոխության տրամաբանությունից դուրս է և դրան հակոտնյա է:

Ըստ Խառատյանի՝ այսօր իշխանություններին քաղաքացիական հակակշիռ չկա, փոխարենն այդ տեղն ուզում են զբաղեցնել նախկին իշխանությունները:

«Վարչապետի շատ պնդումների մեջ բազմաթիվ խնդրահարույց կետեր կան, օրինակ՝ ԱԱԾ-ի տոնի առթիվ վարչապետի պնդումը, թե մեր ԱԱԾ-ն երբեք կարմիր գծերը չի հատել: Երիցս փոխված, ԽՍՀՄ-ից անկախություն հռչակած, ապա երեք իշխանություն փոխած պետության հեղափոխական իշխանության վարչապետը, իհարկե, անվերապահորեն չպետք է պնդեր, թե ԱԱԾ-ն երբեք կարմիր գծեր չի հատել: Այսօր մենք չունենք ԱԱԾ-ի վերլուծված անցյալը»,- ասել է ազգագրագետը:

Խառատյանի կարծիքով՝ հեղափոխությունն իրականացվել է հստակ չձևակերպված և չձևավորված գաղափարներով, մինչդեռ հանրային պահանջը ներպետական բոլոր հարաբերություններն իրավական հարթություն տեղափոխելն էր. «Կոռուպցիան, իշխանություն-հասարակություն հարաբերությունները, օլիգարխիան մեր երկրում ոչ իրավական կատեգորիաներ էին: Հեղափոխության ծրագիրն իրավիճակը փոխելն էր: Օլիգարխների՝ իշխանությունում հայտնվելու ուղիները, օրինակ, խմբագրվեցին միայն սելեկտիվ կերպով»,-նշել է նա:

Ըստ Հրանուշ Խառատյանի՝ որոշ գործարարներ, օրինակ՝ Սամվել Ալեքսանյանը, այսօր էլ կարող են ազդել օրենքների ընդունման վրա՝ ելնելով տնտեսության վարման իրենց պատկերացումներից, և վատ է, որ իշխանությունն այդ դուռը բացում է նրանց առաջ:

«Այսօր իշխանությունում կա և՛ անփորձություն, և՛ որոշակի փութկոտություն: Չեմ կարող հստակ պնդել, թե սա ծրագիր է՝ շեղվելու հեղափոխական ճանապարհից, բայց իշխանության գլխավոր խնդիրը և հասարակության հիմնական պահանջն իրավական պետություն ստեղծելն է: Այդ խնդիրը լուծված չէ»,- ասել է նա:

Մանրամասները՝ տեսանյութում: