«Իմ զինվոր բալե՛ք. միմյանց նկատմամբ ներողամիտ եղեք, ուշքի եկե՛ք տղերք ջան, մենք Ձեզանից թանկ բան չունենք».Մարգարիտա Խաչատրյան

Newsmedia.am-ի զրուցակիցն է «Զինվոր» համակարգող խորհրդի նախագահ, Բանակի Մայր Մարգարիտա Խաչատրյանը:

-Տիկին Խաչատրյան, ինչպես կբնութագրեք Զինված ուժերում տիրող ներկայիս իրավիճակը: Ձեր կարծիքով, բարոյագեբանական առումով ի՞նչ լրջագույն խնդիրներ կան, որոնք կարող են պատճառ դառնալ հատկապես ինքնասպանությունների…

-Բանակում հենց այնպես ինքնասպանություններ չունենք. մենք ունենք ինքնասպանությունների հասցնելու դրդապատճառներ, ինչը մեր բալեքին կարող է դրդել նման քայլի:
Անաստված բան է՝ զինվորների հետ կատարվածը, որակել որպես ինքնասպանություն:
Դուք պատկերացնում ե՞ք որդեկորույս մոր վիշտը, որին գումարվում է ինքնասպանության խարանը: Մենք պետք է աշխատենք, որ զինվոր-զինվոր, զինվոր-սպա հարաբերություններում բարոյահոգեբանական վիճակը այնքան բարելավվի, որ զինվորը սպայի համար դառնա հարազատ որդի: Եթե սպան բանակում իր պարտականությունները լիարժեք կատարի` մենք զինվորների նկատմամբ ոտնձգությունների դեպքեր չենք ունենա:

-Այսինքն սպայական կազմի՞ բացթողման խնդիր ունենք:

-Ավելի շուտ ոչ թե բացթողում է, այլ խնդիրն այն է, որ սպայական կազմի դերն ու նշանակությունը այսօր իջել է շատ ցածր մակարդակի: Սպան իրավունք չունի լիարժեք հրաման արձակելու, սպան զինվորին հավասար նույն NOKIA հեռախոսն է բռնում, սպան ախ է քաշում, թե երբ ծառայությունը կվերջացնի, որ տուն կգնա: Երբեւիցէ մեր բանակը այս կարգավիճակում չի եղել:
Մենք միշտ էլ ունեցել ենք այս խնդիրը, բայց հեռախոսների մուտքը բանակ` ավելի արագացրեց ու խորացրեց այն:

 -Տիկին Խաչատրյան, շատերը վերջին ցավալի դեպքերը կապում են բանակում քրեական ենթամշակույթի հետ: Դուք ի՞նչ կասեք՝դրա հետ կապված:

-Գիտեմ գիտեմ բալես…Քրեական հեղինակություն չկա բանակում. բանակ են գնում հիմնականում խեղճ ու անճարի զավակները: Իսկ սոցիալապես անապահով ընտանիքից դուրս եկած զավակը՝ երբեք քրեական հեղինակություն չի կարող դառնալ. իրանց կերած կաթը դա չի թողնի: Մեկ այլ բան է. որ այ՛ո, հովանավորչություն կա որոշ զինվորների նկատմամբ, ովքեր հավասար ծառայություն չեն իրականացնում:

Պաշտպանության նախարար Դավիթ Տոնոյանը , շատ լավ գիտի բանակի վիճակը. մենք բանակից թանկ բան չունենք, պետք է ազգովի սատար կանգնենք մեր բանակին, մեր բալեքին:

-Տիկին Խաչատրյան, կառանձնացնե՞ք երկու կարեւոր խնդիր, որն օր առաջ պետք է շտկել` նման ցավալի դեպքերից խուսափելու համար:

-Պետք է լուծել հավասարարության խնդիրը: Պետք է հասկացնել, որ մենք լավ ու վատ տղա չունենք.բոլորը մերն են: Երկրորդ՝պետք է հասկանալ, որ չի կարող համ զինվորը նույն հեռախոսը պահի, համ՝ գնդապետը: Պատկերացնում ե՞ք, էսօր սպան չի կարող սանձել զինվորին՝ հեռախոս պահելու համար:

Մենք պետք է ամեն ինչ անենք, որպեսզի սպայի դերն ու նշանակությունը նույնպես բարձրանա:

-Տիկին Խաչատրչյան, նկատենք, որ շատ խոսվեց նաեւ էլիտար զորամասների մասին թեման: Իրականում շատ կա՞ն այդպիսի զորմասեր, ըստ Ձեզ:

-Մենք էլիտար զորամաս՝ այն էլ է Արցախում, չունենք: Սահման պահող զորամասը՝ էլիտար լինել չի կարող: Ես էլիտար զորմաս չեմ հանդիպել բալես: Էդ ասողները չեն մտածում, որ հակառակորդի ջրաղացին են ջուր լցնում, մենք պետք է սատար կանգնենք մեր բալեքին: Որովհետեւ, իրենք են գիշեր-ցերեկ մեր անդորրը պահպանում: Էսօր խրամատը նկարներով տեսած մարդիկ՝ հեշտությամբ են փնովում բանակը: Մի հատ գնացեք տեսեք, թե ինչ խնդիրներն են ընկած էդ ամեն ինչի հետեւում: Մենք, որ մեր բանակի դերն ու նշանակությունը չիմանանք, էլ ո՞վ պետք է իմանա:

-Տիկին Խաչատրյան, վերջում Ձեր հորդորը այսօր մեր սահմանները անառիկ պահող զինվորներին, եւ իրենց զավակներին կորցրած մայրերին:

-Մեր մայրերին մաղթում եմ համբերություն, եւ ամրություն: Մայրեր ջան, երբեք մեր տղաներին բացակա չենք դնի, նրանք կան ու կլինեն մեզ հետ միասին: Իսկ իմ զինվոր բալեքին հետեւյալը կասեմ.«Իմ զինվոր բալեք, Ձեր ձեռքերի տեղը ոտքներդ պաչեմ, Ձեր ոտը լվանամ ՝ ջուրը խմեմ, միմյանց նկատմամբ եղեք ներողամիտ. ուշքի եկեք տղերք ջան: Պաղատում եմ Ձեզ՝ իմ զնվոր բալեք, մենք առանց Ձեզ ոչինչ ենք»:

NewsMedia.am

Լուրեր Հայաստանից եւ աշխարհից