«Իրավիճակը Ադրբեջանի հետ՝ հայոց պետությունների սահմանին, կարող է ապակայունանալ ամեն պահի».Ռազմական փորձագետ

«Մենք պետք է հստակ գիտակցենք․ իրավիճակը Ադրբեջանի հետ հայոց պետությունների սահմանին, կարող է ապակայունանալ ամեն պահի։ Ցավոք այդ առումով նախաձեռնությունը հակառակորդին է պատկանում։ Հայկական կողմը շահագրգռված չէ սրել իրավիճակը սահմանին, մինչդեռ հակառակորդն ընդհակառակը՝ շահագրգռված է։ Սահմանին իրավիճակն ապակայունացնելը ՝Բաքվում դիտարկվում է որպես մեզ հետ «ուժի դիրքերից» խոսելու մարտավարության բաղադրիչներից մեկը»,-NewsMedia.am-ի հետ զրույցում անդրադառանալով սահմանային իրավիճակին եւ լայնամաշտաբ ռազմական գործողությունների հնարավոր վերսկսմանը, ասաց ռազմական փորձագետ ԴԱՎԻԹ ՋԱՄԱԼՅԱՆԸ, ընդգծելով.

-Թե ե՞րբ, պետական սահմանի ո՞ր հատվածում, և ի՞նչ աստիճանի սրել իրավիճակը՝ որոշում են իրենք։ Ըստ այդմ՝ մեզ համար սահմանին անկայունությունը, երբեք անսպասելի չպետք է լինի։ Եվ ամենակարևորը՝ մեր հակազդումը միշտ պետք է լինի մեկը. անհամաչափ հուժկու։ Այլընտրանք չկա, հենց այս կերպ մենք պետք է նախաձեռնությունը խլենք հակառակորդից։ Նախորդ տարիների փորձն է հուշում․ երբ իր նախահարձակ ագրեսիվ գործողությունների հետևանքով հակառակորդը զգալի, հանրային հնչեղություն առաջացնող կորուստներ է ունենում, ապա մի որոշ ժամանակ չի դիմում ագրեսիվ քայլերի։

«Անդորրը» ուներ հստակ, քաղաքական նպատակ

-Պարոն Ջամալյան, ի՞նչով է պայմանավորված վերջին շրջանում սահմանին տիրող հարաբերական անդորրը:

-Վերջին շրջանի «անդորրը» ուներ հստակ քաղաքական նպատակ․ պայմաններ ստեղծել Վիեննայի և Սանկտ -Պետերբուրգի պայմանավորվածությունները բանակցային օրակարգից դուրս մղելու համար։ Անդորրը հարկավոր էր, որպեսզի Արցախ -Ադրբեջան պետական սահմանին վստահության ամրապնդման մեխանիզմների ներդրման կարիք չլինի, ավելի հստակ՝ առերևույթ չլինի։ Մենք այժմ տեսնում ենք, որ Բաքուն, ըստ էության հասավ այդ նպատակին․ Վիեննայի և Սանկտ- Պետերբուրգի պայմանավորվածություններն այսօր օրակարգում չեն։ Այսինքն ժամանակավոր ու խաբուսիկ, անկայուն անդորրով, ինչը Փաշինյանն առ այսօր ներկայացնում է որպես իր ձեռքբերում, բեկանվեց Վիեննայի և Սանկտ -Պետերբուրգի պայմանավորվածություններով պայմանավորված հաստատուն, տևական անդորր հաստատելու գործընթացը։ Եվ հետո, այդ պայմանավորվածություններով փաստորեն Արցախի ներկա պետական սահմանը լեգիտիմացնելու առաջին քայլն էր արվել։ Արցախի դեմ իր երկրորդ ագրեսիան սանձազերծելով և ձախողվելով՝ Բաքուն փաստորեն լեգիտիմացրել էր վերահաստատված Արցախի պետական սահմանը։ Վիեննայի և Սանկտ -Պետերբուրգի պայմանավորվածություններն ադրբեջանական երկրորդ ագրեսիայի ձախողման իրավաքաղաքական արձանագրումն էին, երբ տարածք վերադարձնելու թեման բանակցային օրակարգից դուրս էր մղվել, փոխարենը օրակարգ էին բերվել վերահաստատված Արցախի պետական սահմանը միջազգային կառույցների կողմից ընդունելի դարձնելուն ուղղված քայլերը։ Ահա այդ կարևոր ձեռքբերումից հետ քայլ է արվել։

-Պարոն Ջամալյան, Արցախում տիրող ներքաղաքական գործընթացները` ինչպիսի՞ ազդեցություն կարող են թողնել սահմանային իրավիճակի վրա:

-Նախկինում նախընտրական գործընթացները՝ քարոզարշավով պայմանավորված. անառողջ մթնոլորտը, չեն հանգեցրել արցախյան հանրության խորքային պառակտման։ Արտաքին վտանգի սթափեցնող ազդեցությունն, այդ վտանգի գիտակցումը հիմնական քաղաքական դերակատարների կողմից, շատ դեպքերում՝ քաղաքական տարբեր թիմերում գտնվող գործիչների ազգակցական կապերն ու խրամատի ընկերությունը ապահովել են Արցախում նախընտրական թոհուբոհից բնականոն կյանքին արագ անցումը, թույլ չեն տվել որպեսզի նախընտրական կրքերը վերաճեն մարդկային հարաբերությունները թունավորող ատելության։ Այժմ «հեղափոխական» անառողջ, պառակտչական մոտեցումները Երևանից փոխանցվում են Արցախ։ Բնականաբար այդ ատելությունը՝ հանրության տարբեր հատվածների միջև, որն առկա է այստեղ՝ ՀՀ-ում, Արցախում վերարտադրվելու դեպքում լրջագույն վտանգներ է ստեղծելու։ Հուսադրողն այս դեպքում այն է, որ եթե այդ պառակտումից հակառակորդը փորձի օգտվել, ապա արցախյան հանրությունն արագ կհամախմբվի։ Արցախում շատ ուժեղ է սահման մեկնելու բնակչության պատրաստակամությունը, ինչը մեր պաշտպանական ռեսուրսի կարևորագույն բաղադրիչներից է։ Բայց ինչու՞ ստեղծել թշնամու համար բարենպաստ պայմաններ։ Չէ՞ որ թշնամական ագրեսիայի ձախողման գինը ազգի սերուցքի, մեր նվիրյալների կյանքերն են։ Ճանաչելով Արցախը, այնուամենայնիվ հույս ունեմ, որ արցախյան հանրային ընկալումներում պետականության թուլացման վտանգի հստակ գիտակցումը կկանխի զարգացումների դեստրուկտիվ ընթացքը։

NewsMedia.am 

Լուրեր Աշխարհից եւ Հայաստանից