Ավստրալացին ազատազրկվել է կարանտինը խախտելու և սիրած աղջկա հետ հանդիպելու համար (տեսանյութ)
Ավստրալիայում դատարանն ազատազրկման է դատապարտել 35-ամյա տղամարդուն, որը կարանտինը խախտել է սիրած աղջկան այցելելու համար: Նա դարձել է առաջին մարդն Ավստրալիայում, որն ազատազրկվել է մեկուսացման կանոնները խախտելու համար, տեղեկացնում է Age պարբերականը:
Ավստրալացի Ջոնաթան Դևիդը մարտի վերջին եկել էր Պերտ քաղաք և երկու շաբաթ պետք է կարանտինային ռեժիմում գտնվեր տեղի հյուրանոցներից մեկում: Սակայն, ինչպես տեղեկացրել են հյուրանոցի աշխատակիցները, 4 օրվա ընթացքում նա 5 անգամ լքել է իր համարը, ինչից հետո հյուրանոցի ներկայացուցիչները կապվել են ոստիկանության հետ:
Իրավապահ մարմինները նրան մեղադրել են սիրած աղջկան տեսնելու և սնունդ գնելու նպատակով մեկուսացման կանոնները խախտելու համար:
Դատավոր Էլեյն Կամպիոնը ավստրալացուն «եսասեր» է անվանել, նրան տուգանել 2000 ավստրալական դոլարով (շուրջ 1200 ԱՄՆ դոլար) և դատապարտել 6 ամիս 2 շաբաթ պայմանական ազատազրկման, ընդ որում՝ մեկ ամիսը ավստրալացին պետք է անցկացնի ճաղերի ետևում:
«Դուք ավելին եք, քան անխելքը, ձեր գործողությունները ծայրահեղ եսասիրական են, ձեր գործողությունները անխոհեմ են այն իմաստով, որ դուք ուշադրություն չեք դարձրել այն սպառնալիքի վրա, որը կարող եք ներկայացնել հասարակության համար»,-ասել է դատավորը:
Արևմտյան Ավստրալիայում մեկուսացման կանոնները խախտելու համար տուգանքի ամենամեծ չափը կազմում է 50 000 ավստրալական դոլար (ավելի քան 31 000 ԱՄՆ դոլար), հնարավոր է՝ նշանակվի նաև 12 ամսվա ազատազրկում:
Վերջին տվյալներով՝ Ավստրալիայում գրանցվել է կորոնավիրուսով վարակման 6416 դեպք, 61 մարդ մահացել է:
Աշխարհում նոր տեսակի կորոնավիրուսի համավարակի հետևանքով զոհերի թիվը գերազանցել է 120 000-ը՝ հասնելով 126 757-ի, գրանցվել է վարակման 2 000 231 դեպք, ապաքինվել է 484 600 մարդ։ Այս մասին վկայում են Worldometers առցանց թարմացվող կայքի տվյալները։
Տեսանյութը կարող եք դիտել այստեղ: