Արցունքն աչքերին խնդրեց.«Քո՛ւր ջան, ես գիտեմ որ դու անմեղ ես. բայց հանուն երեխայի ընդունի, որ պարտվել ես. մարզի դատախազի պահանջը կատարի`որ հասնես փոքրիկիդ»

NEWSMEDIA.am-ը շարունակում է անդրադառնալ ամենատարբեր աղմկահարույց քրեական գործերին, վեր հանելով  դրանց հիմքում ընկած փաստական տվյալները, եւ գործում առկա անօրինությունները: Այս անգամ NEWSMEDIA.am-ի խմբագրությանն է դիմել Շիրակի մարզի Գյումրի քաղաքի թիվ 27 դպրոցի այլեւս նախկին տնօրեն Կարինե Լալազարյանը, ով մանրամասներ է ներկայացրել իր հանդեպ հարուցված (երեք դրվագով) քրեական գործի վերաբերյալ, եւ ներկայացրել, թե ինչ անմարդկային եղանակով են մարզային իշխանությունները՝ մարզի դատախազ Կարեն Գաբրիելյանի անմիջական նախաձեռնությամբ, հրաժարականի դիմում կորզել իրենից՝ չխորշելով անգամ օգտագործել տիկնոջ 1.5 տարեկան մանկահասակ երեխային այլեւս չտեսնելու վարկածը:

18 օր ինձ պահել են ՔԿՀ-ում՝ պատանդի կարգավիճակում, մինչեւ որ մարզի դատախազի անմիջական ճնշումների ներքո, աշխատանքից ազատման դիմում չգրեցի…Հետո նոր, դրանից հետո ինձ ազատ արձակեցին:

(Կարինե Լալազարյան)

Թե ինչ հոգեբանական եւ բարոյական ճնշումների ներքո են տիկին Լալազարյանից հրաժարականի դիմում կորզել եւ, թե ի՞նչ եղանակներով է մարզի դատախազը փորձել տիկինոջը հավաստիացնել, որ միակ ելքը իրեն մեղսագրվող արարքները ընդունելն է. մեր զրուցակիցը նախ անդրադարձավ նախապատմությանը.

-2019 թվականի մարտի 26-ին, ինձ՝ որպես կասկածյալ, հրավիրեցին մարզային քննչական վարչություն հարցաքննության: Որից հետո ինձ ձերբակալեցին, ապա կալանավորեցին: 18 օր ինձ պահել են ՔԿՀ-ում՝ պատանդի կարգավիճակում, մինչեւ որ մարզի դատախազի անմիջական ճնշումների ներքո՝ աշխատանքից ազատման դիմում չգրեցի…Դրանից հետո, նոր ինձ ազատ չարձակեցին:

-Տիկին Լալազարյան, իսկ ի՞նչ գործով էիք ներգրավվել՝ որպես կասկածյալ:

-2018 թվականի ապրիլից հետո, դպրոցում սկսվեցին բազմաթիվ ստուգումներ. տարբեր մեղադրանքներ էին առաջադրվում, ապա հետաքննության փուլում ավարտվում:
2019 թվականի հունվար ամսին, ուսուցիչներից մեկը բողոք էր գրել Կրթության պետական տեսչություն, իբր դպրոցում կան բազմաթիվ չարաշահումներ, յուրացումներ եւ այլն: Սկսվեցին ստուգումներ. փետրվարի 8-ին, Կրթության պետական տեսչության տեսուչները հայտնվեցին դպրոցում, եւ ինձ բառիս ուղիղ իմաստով. փակեցին իմ աշխատասենյակում՝ թույլ չտալով մասնակցել այն ժողովին, որը իրենք էին հրավիրել: Այդ ժողովի ընթացքում, սկսեցին իմ դեմ բողոքներ հավաքել՝ ուսուցիչներին ճնշելով, համոզելով, որ ով ինչ ուզում է գրի`  ես միեւնույն է  չեմ աշխատելու: Ես հասկացա, որ այդ օրվանից իմ դեմ խմորումները ավելի լուրջ ընթացք են ստանում:

Ինձ հրավիրեցին հարցաքննության, եւ մեղադրեցին կաշառք ստանալու մեջ՝ ուսուցչին մրցույթով անցկացնելու համար: Ինձ ասացին, որ ես կաշառք եմ վերցրել, եւ որ ես պետք է պատժվեմ: Երեք օր ՁՊՎ-ում պահելուց հետո՝ ինձ տեղափոխեցին ՔԿՀ: Ապրիլի 8-ին,  ինձ տեսակցության եկավ իմ փաստաբանը,   եւ ասաց,  որ դատախազությունը մեղմացրել է իր վերաբերմունքը՝ իմ նկատմամբ:

Փաստաբանս ինձ ասաց, որ պետք է խոստովանական ցուցմունք տամ, ապա աշխատանքից ազատման դիմում գրեմ, եւ դրանից հետո միայն՝ այլեւս ազատ կարձակվեմ: Բնականաբար, հրաժարվեցի չարածս բանի համար խոստովանական ցուցմունք տալ: Նույն օրը երեկոյան, մարզի դատախազը՝ Կարեն  Գաբրիելյանը իր աշխատասենյակ էր հրավիրել քրոջս եւ քեռուս տղային, եւ իր իսկ կաբինետում՝ ամենայն խստությամբ զգուշացրել. «Եթե քույրդ աշխատանքից ազատման դիմում չգրի՝ ՔԿՀ-ից դուրս չի գա, եւ երեխայի երեսին կարոտ կմնա»: Երբ քույրս դատախազին ընդդիմանում է, նա ասում  է, թե. կարող է՞ դու էլ ես ուզում գնաս՝ քուրիկիդ կողքը նստես:

-Եւ այդ ամենը, Շիրակի մարզի դատախազը իր աշխատասենյակո՞ւմ է ասել՝ տիկին Լալազարյան…

-Այո, բայց ամենադաժանը դեռ առջեւում էր: 18 օր շարունակ ես զրկված էի տեսակցություններից, առհասարակ լուր չունեի մանկահասակ երեխայիցս, ում քսանչորս տարի սպասելուց հետո եմ լույս աշխարհ բերել: Փոքրիկս այդ ընթացքում ջերմություն է ունեցել, իսկ մարզպետարանի երեխաների խնամքի բաժնից եկել են ամուսնուս ասել. եթե չի կարողանում պահել մանկահասակ երեխային՝  ապա կարող են տեղափոխել մանկատուն: Ինչեւէ, տեսենելով որ միակ ելքը իմ աշխատանքից ազատումն է, քույրս երեխային գրկած եկավ ՔԿՀ, ու բառիս բուն իմաստով արցունքներն աչքերին խնդրեց. «Քուր ջան,  ես գիտեմ որ դու անմեղ ես, բայց ընդունի, որ պարտվել ես՝ դիմում գրի ազատվի: Մարզի դատախազի պահանջը կատարի, ու արի հասի փոքրիկիդ»:

Ապրիլի 9-ին ազատման դիմումս ուղարկեցի, ապրիլի 12-ին՝  գաղութից  ինձ բաց թողեցին: Մարզի դատախազը շատ լավ գիտեր, որ ես ամեն ինչի հասել եմ ինքնուրույն, ու փաստորեն ես էլ դարձա ամենախոցելին՝ տվյալ իրավաիճակում:

-Հիմա քր. գործը ի՞նչ ընթացքի մեջ է տիկին Լալազարյան:

-Քրեական գործը նախաքննության փուլում է՝ մարզի դատախազի թեթեւ ձեռքերով ինձ երեք հոդվածով մեղադրանք են առաջադրել:

-Ի՞նչ հոդվածներով է մեղադրանք առաջադրված:

-309 հոդվածով՝ պաշտոնական լիազորությունների չարաշահում,311 հոդվածով՝ (կաշառքի ստանալու) եւ 179 հոդվածով՝ (փաստաթղթերի կեղծում):

-Լավ, եթե հետադարձ հայացք նետենք, ըստ Ձեզ ինչո՞ւ, ինչպես Դուք եք նշում՝ հայտնվեցիք մարզի դատախազի թիրախում:

-Ինձ համար մինչ օրս հանելուկ է. ցավալին այն է, որ իմ դեմ բողոք են ներկայացրել մարդիկ, որոնց հետ այնքան ջերմ հարաբերություններ եմ ունեցել, որքան կարողացել եմ օգտակար եմ եղել: Ճիշտ է, ես խստապահանջ եմ եղել՝ ինչպես իմ, այնպես էլ իրենց նկատմամբ: Ես չեմ հասկանում , թե ինչ տեղի ունեցավ:

ՆՈՆԱ ԱԴԱՄՅԱՆ

NewsMedia.am 

Լուրեր Հայաստանից եւ աշխարհից