ԵԱՀԿ ՄԽ-ն մտադիր է հասնել ռազմական գործողությունների դադարեցմանը Լեռնային Ղարաբաղում. Ֆրանսիայի ԱԳՆ

Ֆրանսիայի արտաքին գործերի նախարար Ժան-Իվ Լե Դրիանը Ադրբեջանի եւ Հայաստանի արտգործնախարարներին նախազգուշացրել է Լեռնային Ղարաբաղում հակամարտության միջազգայնացման սպառնալիքի մասին:

Ինչպես նշվում է հաղորդագրության մեջ, Լե Դրիանը մի քանի հեռախոսազրույց է ունեցել Բաքվի եւ Երեւանի իր գործընկերների հետ. «Այս զրույցների ընթացքում վերստին շեշտվել է ռազմական գործողություններն առանց հապաղելու և նախապայմանների դադարեցնելու անհրաժեշտությունը»,- հայտնել են նախարարությունից: «Ես նախազգուշացրել եմ իմ զրուցակիցներին հակամարտության միջազգայնացման սպառնալիքի մասին»,- այդ բանակցությունների ընթացքում ասել է ֆրանսիական դիվանագիտության ղեկավարը:

ԵԱՀԿ Մինսկի խումբը մտադիր է հասնել ռազմական գործողությունների դադարեցմանը Լեռնային Ղարաբաղում և առանց նախապայմանների բանակցությունների շուտափույթ վերսկսմանը, նշվում է Ֆրանսիայի արտգործնախարարի հայտարարության մեջ:

«Միացյալ Նահանգների, Ֆրանսիայի եւ Ռուսաստանի նախագահների` հոկտեմբերի 1-ին արված հայտարարության ոգով ես շեշտեցի Ֆրանսիայի վճռականությունը` որպես Մինսկի խմբի համանախագահ, անաչառորեն կատարել իր դերը` ռազմական գործողությունների դադարեցմանը հասնելու եւ առանց նախապայմանների բանակցությունների շուտափույթ վերսկսման համար` ԵԱՀԿ Մինսկի խմբի համանախագահների հովանու ներքո»,- ասել է ֆրանսիական դիվանագիտության ղեկավար:

Ֆրանսիայի արտգործնախարարը շնորհակալություն է հայտնել իր զրուցակիցներին Le Monde-ից երկու լրագրողների տարհանման գործում ներդրման համար, ովքեր երեկ վիրավորվել էին Լեռնային Ղարաբաղում: