<<ՀԱՅՈՑ ՀԱՅՐԵՆԻՔ>> կուսակցության հայտարարությունը (ՀՐԱՏԱՊ) կուսակցության ղեկավար մարմնի անդամ, կուսակցության արտասահմանյան կառույցների գլխավոր հանձնակատար Վարդան Ղուկասյանի կյանքը վտանգված է
<<ՀԱՅՈՑ ՀԱՅՐԵՆԻՔ>> կուսակցության հայտարարությունը (ՀՐԱՏԱՊ)
Հարգելի հայրենակիցներ,
Հայաստանի Հանրապետության քաղաքացիներ և աշխարհի բոլոր ծագերում սփռված հայություն.
Այսօր տեղեկություն ստացվեց, որ մեր զինակից, <<Հայոց Հայրենիք>> կուսակցության ղեկավար մարմնի անդամ, կուսակցության արտասահմանյան կառույցների գլխավոր հանձնակատար Վարդան Ղուկասյանի կյանքը վտանգված է:
Վտանգված է իր քաղաքական դիրքորոշման և քաղաքացիական տեսակետի արտահայտման համար:
Փորձ է արվում ճնշել ազգանվեր անհատի և քաղաքական գործչի ազատ խոսքը: Ճնշել բռնությամբ, քաղաքական սպանության սպառնալիքով:
Հայրենակիցներ՝ ի Հայաստան և ի սփյուռս աշխարհի, <<Հայոց Հայրենիք>> կուսակցությունը միանշանակ և աներկբա թիկունք է կանգնած Վարդան Ղուկասյանին և ակնկալում է Ձեր բոլորիդ, այսինքն յուրաքանչյուրիդ բարոյական աջակցությունը: Ակնկալում ենք նաև միջազգային հանրության և մարդու իրավունքների պաշտպանությամբ զբաղվող միջազգային կառույցների, կազմակերպությունների և անհատների աջակցությունը:
Մենք երբեք չենք նահանջել մեր դիրքերից, սկզբունքներից, չենք դավաճանել մեր երկրին ու մեր հայրենակիցներից ոչ մեկին:
Չենք նահանջելու: Դա ի գիտություն նրանց, ում համար անծանոթ են անդավաճանություն և նվիրում հասկացությունները:
Կոչ ենք անում՝ սթափվե՛ք և եղե՛ք իրատես, պահպանե՛ք բարոյականության նորմերը, գնահատե՛ք և հարգե՛ք քաղաքական գործչի կատեգորիան: <<Հայոց Հայրենիք>> կուսակցությունը չի հանդուրժի որևէ բռնություն, քաղաքական հալածանք մեր հանդեպ: Մեր պատասխանը կդառնա ձեր քաղաքական տապանաքարը:
Հայի և Հայաստանի թշնամիները Թուրքիան և Ադրբեջանն են: Հայ մարդու արյունը թափել երազող կամ պլանավորողը մեզ համար նույնանում է նրանց հետ:
Հայտարարում ենք նաև, որ <<Հայոց Հայրենիք>> կուսակցության իրավաբանական խորհուրդը հրատապ կազմում է հանցագործության մասին հայտարարության տեքստ՝ կից ներկայացնելով ստացված փաստերը: Ժամերի ընթացքում փաստաբանական խումբը կդիմի Հայաստանի Հանրապետության գլխավոր դատախազություն, Հայաստանի Հանրապետության Ազգային Անվտանգության ծառայություն, Հայաստանի Հանրապետության Ոստիկանություն և Ինտերպոլի գրասենյակ:
Դրանից զատ, <<Հայոց Հայրենիք>> կուսակցության սույն քաղաքական հայտարարության օրինակները կուղարկվեն Հայաստանի Հանրապետությունում գործող բոլոր դեսպանատներ, Հայաստանի Հանրապետությունում ՄԱԿ-ի գրասենյակ, Հայաստանի Հանրապետությունում Եվրոխորհրդի գրասենյակ, Հայաստանի Հանրապետության մարդու իրավունքների պաշտպանին, Ամենայն Հայոց Կաթողիկոս Գարեգին Բ-ին, Մեծի Տանն Կիլիկիո Կաթողիկոս Արամ Ա-ին, Ռուսաստանում, ԱՄՆ-ում գործող բոլոր հայ համայնքներին, բարեսիրական կառույցներին և պետական մարմիններին:
<<ՀԱՅՈՑ ՀԱՅՐԵՆԻՔ>> ԿՈՒՍԱԿՑՈՒԹՅԱՆ ԿԵՆՏՐՈՆԱԿԱՆ ԿՈՄԻՏԵ
Քաղաք Երևան, 02.05.2021, 01:45