Քանի դեռ չեն պատժվել դավադիրները, դասալիքներն ու դավաճանները մենք Հայաստանը կորցնելու վտանգ ունենք նաեւ այսօր․ Արա Խուդավերդյան

44-օրյա պատերազմից մեկ տարի անց վերլուծելով իրողություններն ու ռազմի դաշտում առկա իրավիճակը, որո՞նք էին այն բացերը, որոնց հանրագումարում ունեցանք այն ինչ ունենք այսօր <<Իրավունքը>> զրուցել է պատերազմի բովով անցած <<Կոռնիձոր>> ջոկատի հրմանատար Արա Խուդավերդյանի հետ, ով նախ նկատեց․

-Ես այդ հարցին պատասխանել եմ դեռ պատերազմի դաշտից․ ներսի թշնամու ակտիվությունն ու հակառակորդի գերզարգացած ռազմական ուժը բերեցին մեզ տարերային պարտության, իսկ թշնամուն՝ տարրերային հաղթանակի։ Մենք պետք է շտկենք մեր մեջքը, որը, ցավոք, անգամ ներսից թույլ չեն տալիս։ Մեզ պետք է համախմբվել, որպեսզի կարողանանք բանակը ոչ թե հզորացնել, այլ գերհզորացնել, որպեսզի կարողանանք դաս տալ այն ուժերին, ովքեր մարտնչեցին մեր դեմ, մենք պետք է կարողանանք ծնկի բերել հակառակորդին՝ հետ վերադարձնելով բոլոր տարածքները։

-Պարոն Խուդավերդյան, այսինքն հավատում եք, որ հետ ենք վերադարձնելու կորցրած տարածքները։

-Ես դեռ հույսն ու հավատը չեմ կորցրել, հաշվի առնելով ազգային սերուցքի այն տրամադրվածությունը, որ մենք չունենք կորցնելու, այլ ունենք վերցնելու, հզորացնելու կարգախոսը։ Իսկ ընդդիմությունը թող բարի լինի քար դնի ֆունդամենտի վրա, այլ ոչ թե քարերը քաշի, որպեսզի պետկանության  ֆունդամենտը թուլանա։

-Պարոն Խուդավերդյան, ինչպե՞ս ընկավ Շուշին։ Ի վերջո բերդաքաղաքը հանձնեցի՞ն, թե՞ գրավեցին։

-Ես չեմ առանձնացնում ոչ Շուշին, ոչ Հադրութը, ես ընդհանուր առմամբ այստեղ մեկ ձեռագիր եմ տեսնում։ Քանի դեռ չեն պատժվել դավադիրները, դասալիքներն ու դավաճանները մենք Հայաստանը կորցնելու վտանգ ունենք նաեւ այսօր։ Մինչեւ ներսի թշնամիները օրենքով չպատժվեն՝ ՀՀ-ն անվտանգ չի կարելի համարել։

-Պարոն Խուդավերդյան, որտե՞ղ են այդ դավադիրները։

-Խոսքս չի վերաբերում պետական բարձրաստիճան պաշտոնյաններին, ընչաքաղցությունը եւ դավաճանությունը գալիս է 20-25 տարի առաջվանից։

Ես մի բան կասեմ առայժմ, ՀՀ-ի պետական այրերի դերակատարումը եղել է կարելի է ասել զրոյականից մի քիչ ավել 44-օրյա պատերազմի ընթացքում։ Ինչպես ասաց Սամվել Բաբայանը, ով զբաղեցնում էր Արցախի անվտանգության խորհրդի քարտուղարը, հետաքննությունը պարտավոր է մանրամասն եւ մանրակրկիտ ուսումնասիրել պատերազմի ողջ մանրամասները։

-Հավատո՞ւմ եք, որ նոր ստեղծվող 44-օրյա պատերազմը քննող հանձնաժողովը կկարողանա վեր հանել այն բոլոր բացերը, որոնք առկա էին պատերազմի դաշտում։

-Կհավատամ այն դեպքում, երբ ներգրավված անձիք աչալուրջ, հայրենասեր, պետականամետ, անշահախնդիր հարցաքննությունները տանեն առաջ։ Իսկ եթե հարցաքննությունները կտանեն հիսուն-հիսունի վրա, ապա այդ ժամանակ, իհարկե, գործը կմտնի տուպիկ, եւ մենք, այսպես ասած, քամուն ման կգանք դաշտի մեջ։ Կցանկանայի ինքս էլ ներգրավված լինեի այդ հանձնաժողովում, որպեսզի որպես ականատես ներկայացնեմ պատերազմի դաշտում առկա իրավիճակն իրականում։

ԻԼՈՆԱ ԱԶԱՐՅԱՆ

Iravunk.com