Գունեղ բեմ, զվարճալի դերասանական խաղ, Ձմեռ պապ, նվերներ․Ալենիս միջոցով փոքրիկ ուրախություն պարգեւեցի այն մանուկներին, որոնց հայրերը, ցավոք, չվերադարձան ռազմի դաշտից

Այսօր Արցախի հերոս «Ալեն Մարգարյանի» անվան բարեգործական կազմակերպությունը Թումանյանի անվան տիկնիկային թատրոնի հետ համատեղ կազմակերպել էր «Մեկ օր հեքիաթում» նախագիծը: Որի շրջանակներում շուրջ 400 հարյուր մանուկներ` զոհված հերոսների քույրեր, եղբայրներ, բալիկներ, ինչպես նաեւ կարիքավոր ընտանիքի փոքրիկներ, հնարավորություն ունեցան դիտելու «Ձմեռ պապիկի գործակալը» ամանորյա ներկայացումը:

Գունեղ բեմ, հետաքրքիր դեկորներ, զվարճալի դերասանական խաղ, չարի պայքար՝ բարու հաղթանակով, Ձմեռ պապ, ձյունանուշ, անմահացած զինվորների ժպտուն փոքրիկներ, նվերներ, խինդ, ուրախություն եւ այս ամենը Արցախի հերոս Ալեն Մարգարյանի մայրիկի՝ Նազելի Տերտերյանի ամնմնացորդ նվիրման արդյունքում։

Միջոցառմանը ներկա որդի, եղբայր, ամուսին կորցրած մեր հայրենակիցների ցավից խոնհարված աչքերում մի պահ կրկին սկսեց առկայծել հույսի նշույլ, որ պետք է ապրեն, ապրեն ու արարեն հանուն իրենց զավակների, թոռնիկների ու բալիկների։

<<Տիկին Նազելիի շնորհիվ մի ժամով կտրվեցինք մեր դառը իրականությունից, Ալենը մեզ վերադարձրեց դեպի մանկություն։ Թող Ալենի հիշատակը միշտ վառ մնա, իսկ տիկին Նազելին լինի միշտ մեր կողքին>>, -մեզ հետ զրույցում ասաց 44-օրյա պատերազմում անմահացած սպայի Արսեն Դավթյանի մայրը՝ տիկին Ամալյան։

<<Շնորհակալ ենք տիկին Նազելիին, որ ցավի հետ մեկտեղ ապրում եւ ապրեցնում է նաեւ հազարավոր մայերի։ Մեր ցավը անհատակ է, իսկ նման միջոցառումները մեզ ապրելու ինչ-որ հույս են տալիս>>,- հավելեց 44-օրյա պատերազմում անմահացած Անդրանիկ Աթոյանի մայրը՝ տիկին Ազգանուշը, ով երեք ամիս լույս աշխարհ է բերել որդի։

Իսկ այն ապրումները, այն ցավը, որը կարծես դրոշմված էր հերոսածին մայրիկի՝ տիկին Նազելիի լուսաշող դեմքին, բառերով նկարագրել անհնար է, ինքը՝ տիկին Նազելին եւս դժվարանում էր բառեր գտնել արտահայտելու ցավը, ողողված հանուն հերոս որդու ապրելու եւ արարելու ցանկությամբ․

-Ամբողջ էությունս խեղդում է հուզմունքը՝ ողողված ուրախությամբ։ Ուրախությամբ, որ Ալենիս միջոցով կարողացա մի փոքր ուրախություն պարգեւել այն մանուկներին, որոնց մանկությունը ցավոք դառնացավ։ Դառնացավ չարաբաստիկ պատերազմի պատճառով եւ նրանց հայրերը, եղբայրները ցավոք տուն չվերադարձան։ Հուզված եմ անսահման, հուզմունքը կոկորդս խեղդում է, բայց նայելով փոքրիկների ուրախ աչուկներին, կարծես վերադառնում եմ Ալենիս մանկություն, նրանցից յուրաքանչյուրի մեջ Ալենիցս մի կտոր եմ փնտրում։ Ես այս նախաձեռնությամբ փորձեցի կարճ ժամանակով կտրել մանուկներին եւ նրանց մայրիկներին, տատիկներին այս գորշ իրականությունից, որի մեջ դատապարտված ենք ապրել հավետ։ 

Անդրադառնալով  «Ալեն Մարգարյանի» անվան բարեգործական կազմակերպության առաջիկա ծրագրերին հերոսածին մայրը արցունքներն աչքերին պատմեց․

-«Ալեն Մարգարյանի» անվան բարեգործական կազմակերպությունը թեկուզ նորածին է, բայց հասցրել է լայն գործունեություն տարածել ինչպես ՀՀ-ում, այնպես էլ սահմաններից դուրս։ Տարատեսակ գրքահավաքներ ենք կազմակերպում, հեռավոր սահմանամերձ գյուղեր  բազմաթիվ գրքեր ենք  Ալենիս անունից ուղարկել։ Մեր կազմակերպությունը առհասարակ իր առջեւ խնդիր է դրել կրթական եւ մշակութային ծրագրերի իրակացամանը զարկ տալ, առաջիկայում հիմնելու ենք Ալեն Մարգարյանի անվան կրթօջախը, որի նմանը՝ ինչպես շենքային պայմաններով, այնպես էլ կրթական ծրագրերով չի լինելու հանրապետությունում։

ԻԼՈՆԱ ԱԶԱՐՅԱՆ 

Iravunk.com