ՌԴ ՊՆ հայտարարությունը բավական կոշտ էր, եւ ուղղված էր կոնկրետ հասցեատիրոջ՝ Ադրբեջանին. արձանագրելով, որ իրավիճակի պատասխանատուն կոնկրետ Ադրբեջանն է.Գագիկ Համբարյան

Ադրբեջանը հարվածի տակ է վերցրել Արցախի հարավային ուղղությունը, եթե պաշտոնական Մոսկվան հայտարարություններից այն կողմ չգնաց, ապա դա ցույց կտա, որ ունակ չէ, որպես խաղաղապահ հանդես գալու

Ինչո՞վ է պայմանավորված Արցախի տարածքային ամբողջականության  նկատմամբ թշնամու հերթական սադրանքը, ի՞նչ ազդեցություն կունենա ՌԴ ՊՆ հայտարարությունը, որով արձանագրվեց, որ թշնամին խախտել է նոյեմբերի 9-ին համաձայնագրի կետերը, այս եւ այլ հարցերի շուրջ էլ Newsmedia.am-ը զրուցել է հայտնի քաղաքական վերլուծաբան, ՇՊՀ դասախոս ԳԱԳԻԿ ՀԱՄԲԱՐՅԱՆԻ հետ, ով նախ փաստեց․

-Նախ ասեմ, որ Արցախի տարածքային ամբողջականությունը խախտվել է 2020թ․ սեպտեմբերի 27-ից,  եւ Նիկոլ Փաշինյանը դա արձանագրել է 2020թ․ նոյեմբերի 9-ին։

Ինչ վերաբերում է ներկայիս սրմանը, ապա նախ Ադրբեջանը առիթավորվում է, որ հայությունը շարունակում է գտնվել իր կողմից պարտված քաղաքական ուժի պարագլխի ձեռքում, իսկ ինչո՞ւ այս պահին նա գնաց սրման, որովհետեւ Ադրբեջանը օգտվում է այն հանգամանքից, որ ՌԴ այսօր ավելի շատ զբաղված է ուկրաինական հարցով։ Ըստ իս,  Ադրբեջանը հրահանգ է ստացել իր արեւմտյան տերերից, որպեսզի ՌԴ-ի դեմ բացեն երկրորդ ճակատ՝ փորձելով շեղել պաշտոնական Մոսկվային ուկրաինական ռազմական թատերաբեմից, այսինքն մեկ կրակոցով երկու նապաստակ խփել։

-Պարոն Համբարյան, ՌԴ ՊՆ-ն երեկ հաղորդագրություն տարածեց, որում շեշտել էր, որ մարտի 24-25-ն ընկած ժամանակահատվածում Ադրբեջանի ԶՈՒ-ն խախտել է եռակողմ հայտարարության դրույթները. ադրբեջանական կողմին զորքերը դուրս բերելու կոչ է հղվել: Ադրբեջանի պաշտպանության նախարարությունն էլ արձագանքել է Արցախում իրավիճակի սրման վերաբերյալ ՌԴ ՊՆ հայտարարությանը, ընդգծելով, որ ՌԴ ՊՆ հայտարարությունը «հակասում է երկկողմ հարաբերությունների բնույթին ու դաշնակցային փոխգործակցության մասին հռչակագրին»: Ադրբեջանի ՊՆ-ն ռուսական կողմից պահանջել է ապահովել հայկական զինված ուժերի դուրսբերումը, չկիրառել «Լեռնային Ղարաբաղ» եզրույթը և քարտեզներում ցուցադրել տեղանունների ադրբեջանական տարբերակները։ Ի՞նչ սպասել այս հայտարարությունների հանրագումարում։

-Նախ ՌԴ ՊՆ հայտարարությունը բավական կոշտ էր,  եւ ուղղված էր կոնկրետ հասցեատիրոջ՝ Ադրբեջանին. արձանագրելով որ իրավիճակի պատասխանատուն՝ կոնկրետ Ադրբեջանն է։ Սրան զուգահեռ, այո ռուսական կողմը եւս ստացավ բավական կոպիտ պատասխան, եւ հիմա հարցը հետեւյալն է․ ռուսական կողմը ինչ միջոցներ կձեռնարկի, որպեսզի պահպանի իր սեփական դեմքը։ Որովհետեւ, եթե հայտարարություններից այն կողմ պաշտոնական Մոսկվան չգնաց՝ դա շատ շեշտակի հարված կհասցնի նրա վարկանիշին, որպես խաղաղապահ-միջնորդի եւ բացի այդ ցույց կտա հանրությանը, որ ՌԴ-ն հայտարարություններից այն կողմ չի  կարող գնալ։ Ինչը կրկին կմեծացնի հակառուսական տրամադրությունները՝ հայաստանյան հասարակության մոտ։ Պետք է ընդգծեմ, որ ինքս պրոռուսական դիրքորոշում ունեմ, բայց ամեն դեպքում, մենք պարտավոր ենք ճիշտ արաձանագրումներ անել․ ՌԴ-ն ՀՀ կապիտուլյացիայից հետո համարվում է միակ երաշխավորը՝  ձեւավորված ստատուս քվոյի... եւ հիմա դա  փաստ է, որ  խախտվում է։

Ես էլի եմ նշում. ՀՀ եւ Արցախյան իշխանությունները պարտավոր են ապահովել Արցախում գտնվող հայության անվտանգությունը, բայց այստեղ խնդիրը նրանում է, որ նույնը պետք է աներ նաեւ ՌԴ-ն։ Եւ, երբ ռուս խաղաղապահների ներկայությամբ ադրբեջանցիները բացահայտ սադրանքների են դիմում, ապա այդ խնդիրը հենց ՌԴ-ին էլ է։ Հիմա տեսնենք ՌԴ ՊՆ եւ Ադրբեջանի ՊՆ հայտարարություններից հետո, պաշտոնական Մոսկվան  կոնկրետ ինչ  գործողությունների կանցնի։ Եթե Մոսկվան հայտարարություններից այն կողմ չգնաց, ապա դա ցույց կտա, որ պաշտոնական Մոսկվան ունակ չէ, որպես խաղաղապահ հանդես գալու. սա միանշանակ  Հնարավորություն տալով Ադրբեջանին՝ ավելի ագրեսիվ քայլերի գնալու. եթե ուշադիր եք, ապա կտեսնեք, որ Ադրբեջանը հարվածի տակ է վերցրել Արցախից մնացած մասի հարավային ուղղությունը։

ՆՈՆԱ ԱԴԱՄՅԱՆ 

NewsMedia.am 

Լուրեր  Հայաստանից եւ Աշխարհից