Հայտնի փաստաբանի եւ «Իրավունք Մեդիայի» հերթական հաղթանակը․ԱԺ նախագահը ընդդեմ «Իրավունքի» որոշումը բեկանվել է

<<Իրավունքը>> առիթ ունեցել է տեղեկացնելու ընթերցողին, որ Ազգային ժողովի նախագահ Ալեն Սիմոնյանը դիմել էր դատական պաշտպանության ընդդեմ  <<Իրավունք մԵդիա>> ՍՊԸ-ի։ Առաջին ատյանի դատարանը, չգիտես ինչ պայմաններում, որոշել էր բավարարել ԱԺ նախագահի հայցը։ Սակայն, վերը նշվածի մասին տեղեկանալուց հետո <<Իրավունք Մեդիա>> ՍՊԸ-ն անմիջապես դիմել էր բազմաթիվ աղմկահարույց գործերով հայտնի փաստաբան, հեղինակավոր <<Լեւ Գրուպ>> փաստաբանական ընկերության հիմնադիր ղեկավար Լեւոն Բաղդասարյանին, ով օրենքով սահմանված կարգով, առանց ժամանակ կորցնելու պատրաստեց վերաքննիչ բողոքը։

Եվ ահա, այսօր «ԴատաԼեքս» դատական տեղեկատվական համակարգից տեղեկացանք, որ հայտնի փաստաբանի ներկայացրած վերաքննիչ բողոք դատարանը բավարարել է՝ այն է Երեւան քաղաքի առաջին ատյանի դատարանի կայացրած որոշումը  բեկանել եւ գործը ուղարկել է նույն դատարան՝ նոր քննության։

<<Իրավունք Մեդիա>> ՍՊԸ-ի հերթական հաղթանակի եւ գործի մանրամասների շուրջ զրուցել ենք այդ հաղթանակը՝ իրավական դաշտում ապահովված հանրության լայն շրջանակներին հայտնի փաստաբան ԼԵՎՈՆ ԲԱՂԴԱՍԱՐՅԱՆԻ հետ, ով անդրադառնալով Վերաքննիչ դատարանի կայացրած որոշմանը փաստեց․

-Այ՛ո, ըստ էության դատարանը արդարադատություն իրականացրեց, դատարանի որոշումը դիտում եմ իրավաչափ եւ հեղինակավոր, սա իրավունքի զարգացման հետ կապված հերթական դատական ակտն էր։ Գործը բեկանվել է եւ ուղարկվել նոր քննության, հուսանք, որ դատարանը օբյեկտիվ քննություն կիրականացնի՝ տալով, բնականաբար, օբյեկտիվ գնահատական։ Այստեղ բացարձակ խնդիր չեմ դնում, որ մի կողմում բարձր պաշտոնյա է, իսկ մյուս կողմում չորրորդ իշխանություն, ես կարեւորում եմ, որ դատարանը տանի օբյեկտիվ քննություն եւ տա համապատասխան գնահատական՝ արդյո՞ք լրագրողը իրացրել է իր իրավունքը։ Եվ, եթե իրացրել է իր իրավունքը, ապա գնահատականը միանշանակ պետք է լինի այն, որ հայցը անհիմն է եւ ենթակա է մերժման։ 

Պարոն Բաղդասարյանը ընդգծում է․

-Մեկ անգամ եւս ցանկանում եմ արձանագրել, որ չորրորդ իշխանության դերն ու նշանակությունը միանշանակ պետք է գնահատվի պետական լիազոր մարմինների կողմից՝ դա պետության պոզիտիվ պարտավորությունն է։ Եվ յուրաքանչյուր պաշտոնյա պետք է գիտակցի, որ լրագրողը իրավունք ունի բարձրաձայնելու, վեր հանել բոլոր թերությունները՝ իր իրավասությունների, լիազորությունների սահամանում։

Ընդգծում եմ, որ լրագրողը՝ իր իրավասության սահամաններում, իրավունք ունի ոչ միայն քննադատողական դատողությամբ իրականացնելու, այլ նաեւ հարկ եղած դեպքում իրավունք ունի նաեւ ցնցելու։

Զրույցը՝ ԻԼՈՆԱ ԱԶԱՐՅԱՆԻ

IRAVUNK.com