30 տարի խնդրել ենք, որ կադաստրային քարտեզագրում անեն. ասել են` էդ հարցը կլուծվի հայ-ադրբեջանական վերջանական պայմանավորվածությունից հետո. Ողջ իրականությունը Տիգրանաշենի մասին

Արարատի մարզի Տիգրանաշեն գյուղի բնակիչները շարունակում են ապրել իրենց առօրյա կյանքով ու մտադրություն չունեն հեռանալ գյուղից։ Տիգրանաշենը միավորված է Արարատի մարզի Պարույր Սևակ համայնքին՝ ոչ թե որպես վարչական միավոր, այլ Պարույր Սևակի մի թաղամաս է համարվում։ Բուն Տիգրանաշենի տարածքում կա 42-43 բնակելի տուն՝ 180 մարդով։ 

«Ապրում ենք ժամանակավոր գրանցումով, գրանցված ենք Պարույր Սեւակ գյուղի վրա, որովհետեւ մեր գյուղը, որպես գյուղը այս 30 տարիների ընթացքում այդպես էլ գյուղի կարգավիճակ չստացավ»,-«Իրավունքի» հետ զրույցում ասաց տիգրանաշենցի Բորիսը, ընդգծելով.

-1990-ական թվականներից սկսած, ամեն տարի հունվարից հետո պարտադիր համայնքապետարանին էինք դնում, որ գյուղի կարգավիճակի հարցը լուծվի: Գրություններ են ուղարկվել պրեզիդենտին ու վարչապետին,  խնդրել ենք, որ թույլ տան Տիգրանաշենը քարտեզագրեն, կադաստրային քարտեզագրում անեն, որովհետև օդի մեջ ենք: Բայց մեզ ամեն անգամ բացատրել են, որ էդ հարցը կլուծվի հայ-ադրբեջանական վերջանական պայմանավորվածությունից հետո, որովհետև գոնե էդ տարածքը միջազգայնորեն իրենց տարածքն է՝ նաև մեր կողմից ընդունված։

Տիգրանաշենում շատ քիչ մի մշակովի հողատարածք կգտնեք, որովհետեւ Պարույր Սևակից ենք ջուր բերել, մի քիչ տալիս են, որ մարդիկ հողերը մշակեն: Անգամ խմելաջրի հարցն է վերջին մի քանի տարվա մեջ լուծվել: Էսօր մեծ-մեծ խոսողները թող ժամանակին մտածեին տիգրանաշենցիների մասին, երբ խնդրում էինք, որ մեզ հողերը, տները սեփականաշնորհեն, որ գյուղի կարգավիճակ տան: Թե չէ հրապարակներից գոռլ բոլորը կարան:

«Տիգրանաշենում կան մեկ հիմնական դպրոց, որի աշակերտների թիվը գնալով նվազում է: Այս պահին ունենք 12 աշակերտ, 9-ամյա կրթությունը ստանալուց հետո տեղափոխվում են Պարույր Սեւակ»,-ասաց դպրոցի ուսուցչուհի տիկին Նելլին:

ԻԼՈՆԱ ԱԶԱՐՅԱՆ

Iravunk.com