ՙԵվրատեսիլ՚. ՙGenealogy՚-ի հրաշալի վեցնյակը

Անշուշտ, չի լինի գեթ մեկը, ով չողջունի ՙԵվրատեսիլում՚ մեր երկրի այս տարվա մասնակցության ձևաչափը` Հայոց ցեղասպանության 100-րդ տարելիցին Հայաստանի և սփյուռքի ներկայացուցիչների միասնական ելույթը եվրոպական գլխավոր բեմում, այն էլ` առավել քան խոսուն և խորհրդանշական ՙDon’t denay՚ (ՙՄի° ժխտիր՚) կոչ-երգով: Ի դեպ, մեր տեղեկություններով, երգը գրել է կոմպոզիտոր Արմեն Մարտիրոսյանը:
Թեև Հանրային հեռուստաընկերությունը դեռևս գաղտնի է պահում արդեն իսկ ձևավորված ՙGenealogy՚ (ՙԾագումնաբանություն՚) խմբի կազմը, այդուհանդերձ պրպտելով ՙԵվրատեսիլի՚ կազմկոմիտեին մոտ կանգնած եվրոպական կայքերը (մասնավորապես` wiwibloggs.com-ը), կարելի է ՙբացահայտել՚ աշխարհի մայրցամաքները ներկայացնող հինգ հայ կատարողներին, ինչպես նաև հայաստանցի երգչուհուն: Նշենք, որ այս տեղեկությունները դեռևս պաշտոնական չեն, թեև խմբի սփյուռքահայ անդամներից մի քանիսը սոցկայքերում արդեն իսկ անուղղակիորեն ակնարկել են ՙԵվրատեսիլում՚ իրենց մասնակցության մասին: Ահա ՙGenealogy՚ խմբի հավանական վեցնյակը:

Եվրոպան ներկայացնող Եսայի Ալթունյանի անունը Հանրայինն օրերս արդեն բացահայտեց: Այս ֆրանսիացի երգիչ-երգահանը երգել է ՙPop Idol՚ խմբում, ապա որպես մենակատար իր իսկ գրած երգերով մասնակցել է բազմապիսի հեռուստաշոուների, համագործակցել մաեստրո Միշել Լեգրանի հետ: Այժմ Եսային գործունեություն է ծավալում նաև ԱՄՆ-ում: Ինչ վերաբերում է Հայոց թեմային, ապա երգիչը, կարելի է ասել, մեծացել է Եղեռնի մասին պատմությունների ներքո: Նրա պապը` ջարդերից մազապուրծ եղած Նշանը, անգամ գիրք է գրել` նկարագրելով 1915-ին իր տեսած արհավիրքը: Ուստի պատահական չէ, որ վերջերս` ցեղասպանության 100-րդ տարելիցի առիթով Եսային նկարահանեց ՙJe n’oublie pas՚ (ՙՉեմ մոռանա՚) երգի տեսահոլովակը:
ԱՄՆ-ի ներկայացուցիչ Թամար Կապրելյանը ծնվել է Արիզոնա նահանգի Սքոթսդեյլ քաղաքում հայ-հրեա-բրիտանական ընտանիքում: Ներկայումս բնակվում և ստեղծագործում է Նյու Յորքում: Նա իր կարիերան սկսել է 2008-ին` հաղթելով հայտնի ՙOne Republic՚ խմբի կազմակերպած մրցույթում: 2010-ին թողարկել է իր հեղինակային երգերի ալբոմը` ստեղծագործելով փոփ ռոք ոճում: Եղեռնի մասին լսել է Արևմտյան Հայաստանի Խարբերդ քաղաքում ծնված մորական պապիկից, ում ազգանունն էլ այժմ կրում է: Վերջերս էլ` փետրվարի 10-ին, ՙԹվիթերի՚ եվրատեսիլյան էջը Թամարին գրել է. ՙՎաղը Ձեզ համար հետաքրքիր լուր ունենք Հայաստանից: Երեկոյան պատրաստ սպասեք՚...
Աֆրիկան ներկայացնող Վահե Թիլբյանը ապրում և ստեղծագործում է Եթովպիայի մայրաքաղաք Ադիս Աբեբայում: Նրա երաժշտությունը դժվար է մեկ բառով բնորոշել. ստեղծագործում է մի շարք ոճերում` ռոք, r&b, տեխնո և տարբեր ազգերի երաժշտություն... Առաջադրվել է մի քանի հեղինակավոր երաժշտական մրցանակների, 2012-ին թողարկել է ՙMixology՚ ալբոմը, որը նրան մեծ հաջողություն բերեց միջազգային երգասպարեզում:
Ասիայի ներկայացուցիչ Սթեֆանի Թոփալյանը (հայրը ամերիկահայ է, մայրը` ճապոնուհի) ծնվել է Լոս Անջելեսում, սակայն երգչուհու կարիերան սկսել է Ճապոնիայում` 13 տարեկանում: Համագործակցելով հայտնի ճապոնացի պրոդյուսեր Ջո Ռինոյի հետ` ձայնա-գրել է բազմաթիվ երգեր, ՙJapan records awards 2007՚ մրցանակաբաշխությունում ճանաչվել է ՙՏարվա հայտնություն՚: Նույն տարում թողարկել է երկու ձայնասկավառակ: Նրա երգերը բազմիցս հնչել են անիմացիոն և գեղարվեստական ֆիլմերում: Այժմ ապրում է Տոկիոյում: Հայոց ցեղասպանության մասին շատ պատմություններ է լսել տատիկից` Գոհար Միքայելյան-Թոփալյանից, ում նախնիները գաղթել են Լիբանան, ապա` ԱՄՆ:

Ավստրալիան կներկայացնի Աթենա Մանուկյանը, հունահայ արմատներով այս երգչուհին վերջերս հաստատվել է Սիդնեյում, որտեղ թողարկել է իր վերջին տեսահոլովակը: 2008-ին մասնակցել է ՙՄանկական եվրատեսիլի՚ Հունաստանի նախընտրական փուլին, թեև հաղթող չի ճանաչվել: Այսօր 19-ամյա այս երգչուհու տեսահոլովակների ՙYouTube՚-յան դիտումների քանակը միլիոնի է հասնում: Իր արմատների մասին էլ վերջին հարցազրույցներից մեկում ասել է. ՙՑավոք, դեռ չեմ եղել Հայաստանում, սակայն հորս շնորհիվ ճանաչել ու սիրել եմ հայրենիքս: Նաև հայեցի դաստիարակություն եմ ստացել՚: Իսկ վերջում առաջիկա անելիքների մասին խոսելիս շեշտել է. ՙՄտադիր եմ ընդունել Հայաստանից ստացած հրավերը՚...
Դե, իսկ հայաստանյան մասնակցին, որը, ըստ Հանրայինի խորհրդանշական սցենարի, պետք է համախմբի անմոռուկի թերթիկների հետ զուգակցվող վերոնշյալ հինգ երգիչներին, կարծում ենք, ներկայացնելու կարիք չկա: Ինգա Արշակյանին բոլորս ենք ճանաչում և սիրում` նրա հզոր ձայնի և կատարողական տաղանդի համար...

TV Լրագիր