«Жизнь - Родине, честь - никому» սա է եղել հայրկիս ամենամեծ պատգամը մեզ. Կոմանդոսի որդու բացառիկ զրույցը.Iravunk.com

Մայիսի 8-ին նախագահ Արմեն Սարգսյանի հրամանագրով լեգենդար Արկադի Տեր-Թադևոսյանին հետմահու շնորհվել է Հայաստանի ազգային հերոսի կոչում:  Ազգային հերոսի կոչումը Կոմանդոսի որդուն` Հայկ Տեր-Թադեւոսյանին հանձնել է վարչապետի ժամանակավոր պաշտոնակատար Նիկոլ Փաշինյանը: Ինչը միանշանակ չընդունվեց հասարակության կողմից:

Վերոնշյալի շուրջ, ինչպես նաեւ Կոնմանդոսի` որդուն տված ամենարժեքավոր պատգամի, 17 տարեկանում ստացած առաջին նվերի եւ այլ ուշագրավ հարցերի շուրջ զրուցել ենք անձամբ լեգենդար, լուսահոգի գեներալի որդու` Հայկ Տեր-Թադեւոսյանի հետ:

-Պարոն Տեր Թադեւոսյան, Ձեր հայրիկին շնորհված ազգային հերոսի կոչումը Ձեզ հանձնեց փաստացի այն անձը, ում ղեկավարության օրոք ` Ձեր հայրիկի ազատագրած Շուշին օկուպացվեց թշնամու կողմից: Սա միանշանակ չընդունվեց հանրության կողմից, մեկնաբանեք խնդրեմ:

-  Հայրիկս եղել է Հայաստանի հանրապետության զինվոր, ով իր գիտակցական ողջ կյանքում ծառայել է հայրենիքին եւ Արցախին, եւ մինչեւ վերջ կատարել է իր պարտքը հայրենիքի նկատմամբ: Ես այդ կոչումը ստացել եմ ՀՀ ղեկավարից: Ես պարտավոր էի վերցնել հայրիկս շնորհված կոչումը:  Ես չեմ ցանկանում անդրադառնալ կոնկրետ անձին, մեզ համար ցավալի տարատեսակ շահարկվող խոսակցությունները:

-Որպես Կոմանդոսի որդի, ի՞նչպես եք տեսնում ՀՀ-ի ապագան:

-Գիտեք, հայ ժողովրդին միշտ բարդ ճակատագիր է բաժին հասել: Վերջին պատերազմում մենք ունեցանք մեծ զոհեր, բայց ես հավատում եմ, որ սա հայ ազգի պատմության վերջին էջը չէ` հայ ազգը եղել է, կա ու կմնա: Ես հավատում եմ եւ լիահույս եմ, որ շատ շուտով հայ ազգը եւս մեկ անգամ համաշխարհային պատմության մեջ ոսկյա տառերով կգրի իր նոր հաղթանակների մասին եւ մենք կապացուցենք աշխարհին, որ մենք իրապես արժանապատիվ ազգ ենք:

-Որն՞ է եղել Ձեր հայրիկի ամենակարեւոր պատգամը, որը պարբերաբար Ձեզ հիշեցրել է լուսահոգի Կոմանդոսը:

-«Жизнь - Родине, честь - никому» սա է եղել հայրկիս ամենամեծ պատգամը մեզ: Հայրիկս մեզ մեծացրել է զինվորականի ոգով, միշտ ասում էր, որ հայրենիքից վեր բարձրագույն արժեք չկա եւ որ, հանուն հայրենիքի երբեք ոչինչ  չխնայենք: Այլ խոսքով ասած, զինվորականի ոգով դաստիարակված մարդ եմ, առաջին նվերը, որը ստացել եմ 17 տարեկանում դա «Боевой устав» գիրքն է, այդ գրքով եմ ես դաստիարակվել: Մեր ընտանիքի համար հայրենիքն է բարձրագույն արժեք` այդպես եղել է եւ այդպես շարունակվելու է նաեւ հայրիկիս մահից հետո:

Զրույցը` ԻԼՈՆԱ ԱԶԱՐՅԱՆԻ

Iravunk.com