«Ակնհայտ է՝ նման հայտնի սպորտսմենի սպանությունը, հենց այնպես կազմակերպված լինել չէր կարող »

Նախօրեին Ռուսաստանի Դաշնությունում սպանված թաիլանդական բռնցքամարտի աշխարհի եռակի չեմպիոն, 40-ամյա Աշոտ Բոլյանի սպանությունից ժամեր անց, լրատվամիջոցներում տեղեկություն տարածվեց այն մասին, որ վերջինս Հայաստանում՝ հանցագործ աշխարհում հայտնի օրենքով գող «Մասիվցի Անդիկի» սպանության գործով հարուցված քրեական գործում համարվում էր որպես կասկածյալ:

Թե որքանո՞վ է շրջանառվող վարկածը մոտ իրականությանը, եւ թե արդյո՞ք ռուսական հետագիծ կարող է լինել օրենքով գողի սպանության մեջ, NewsMedia-ն փորձեց լսել քաղաքական վերլուծաբան ԳԱԳԻԿ ՀԱՄԲԱՐՅԱՆԻ տեսակետը, ով նախ նկատեց.

-Սկսենք հարցի վերջին մասից, արդյո՞ք ամիսներ առաջ ՀՀ-ում սպանված օրենքով գող Անդիկի սպանության հետեւում կա ռուսական հետագիծ: Դուք շատ լավ գիտեք, որ օրենքով գողերի ինստիտուտը, որը եղել Խորհրդային միությունում եւ հետագայում ժառանգաբար փոխանցվել է նորանկախ երկրներին`շատ սերտ կապ ունեն իրար հետ: Եվ այս պայմաններում օրենքով գողի սպանությունը պատվիրելու մեջ հատուկ փնտրել ռուսական հետքեր՝ ավելորդ է: Հետաքրքիր մի փաստ ասեմ. հայ-ադրբեջանական պատերազմի ամենաթեժ պահին, հայտնի գողական աշխարհի ներկայացուցիչ Սվո Ռաֆը շատ մտերիմ ընկերներ է ունեցել ադրբեջանցիների շրջանում: Բայց այդ պատերազմը չի ազդել նրանց հարաբերությունների վրա: Ավելին ասեմ. նույն գողական աշխարհի ներկայացուցիչները ավելի շատ գործեր են կարողացել կազմակերպել մեր պետության համար, քան մեր այն ժամանակվա իշխանությունները:Իսկ այն շրջանառվող վարկածը, որ աշխարհի եռակի չեմպիոնն է կազմակերպել Մասիվցի Անդիկի սպանությունը, ամենեւին չի նշանակում, որ այդ ամենի հետում կանգնած է ՌԴ-ն:

-Բայց որքանո՞վ է, ըստ Ձեզ այն համապատասխանում իրականությանը:

Այսպես ասեմ. նա սպորտի բնագավառում շատ մեծ ձեռքբերումներ ունի եւ չի բացառվում, որ շրջանառվող վարկածները համախատասխանում են իրականությանը… ես հստակ ասել չեմ կարող: Բայց մի բան կարծում եմ ակնհայտ է. նման հայտնի սպորտսմենի` ինչպիսին է Բոլյանը, սպանությունը հենց այնպես կազմակերպված չէր կարող լինել: Ինչպես ասում են. «առանց կրակի ծուխ չի լինում»: Եւ չի բացառվում, որ ինչպես շրջանառվող լուրերն են հուշում` նա կարող էր կապ ունենալ օրենքով գող Մասիվցի Անդիկի սպանության հետ: Բայց այդ ամենը բնական է, պարզվում է ավելի նեղ՝ պարփակված շրջապատներում:

-Պարոն Համաբարյան, ըստ Ձեզ, այսօր այնուամենայնիվ ի՞նչ իրավիճակ է տիրում Հայաստանի քրեական աշխարհում:

-Ներկայիս իշխանությունները փորձում են Հայաստանը` Վրաստանի նման «մաքրել» գողական աշխարհի ներկայացուցիչներից: Թե ինչ հետեւանքներ դա կունենա` ցույց կտա ժամանակը: Բայց պետք է նշեմ, որ մեր իշխանությունները պետք է հաշվի առնեն մեկ հանգամանք. այո ՀՀ-ն «մաքրելով» գողականներից` կփորձեն հասարակությանը ներկայացնել, որպես մեծ ձեռքբերում: Բայց միեւնույն ժամանակ մենք չպետք է մոռանանք, որ նույն գողական աշխարհի ներկայացուցիչները շատ մեծ դիրքեր ունեն նախկին Խորհրդային հանրապետություններում եւ հատկապես ՌԴ-ում, որտեղ հայերի թիվը ավելի շատ է: Եւ ցավով պետք է արձանագրեմ` շատ դեպքերում հենց գողականներն են լուծում շատ-շատ հարցեր, որոնք ծագում են Ռուսաստանի հայկական սփյուռքում:

NewsMedia.am

Լուրեր Աշխարհից եւ  Հայաստանից