Այս պահի դրությամբ արդեն 89 հիվանդ ծրագրի շրջանակներում ստենդավորվել է

Ինչպես հայտնի է 2015թ. պետական բյուջեով սրտի անհետաձգելի վիրահատությունների ծրագրի իրականացման համար հատկացվելու է 500 մլն դրամ: Ծրագրի շրջանակներում մշակվել են չափորոշիչները, որոնցով այս կամ այն անհատին կիրականացվի սրտի անվճար անհետաձգելի վիրահատությունը: Մասնավորապես, որ դեպքում կարող են հիվանդները օգտվել ծրագրից, որ բկ-ներում, այս եւ այլ հարցերի շուրջ, Fnews.am-ը  զրուցեց  Առողջապահության նախարարության աշխատակազմի բժշկական օգնության քաղաքականության վարչության պետ ԾԱՂԻԿ ՎԱՐԴԱՆՅԱՆԻՑ,ով նախ անդրադարձավ ծրագրի նպատակին.

-Հունվարի մեկից մեկնարկած սրտի անհետաձգելի բուժօգնության ծրագրի հիմքը նախագահի նախընտրական թեզերում ներառված առողջ ազգաբնակչության հետ կապված թեզն է, որը արդեն 2014թվականի վերջում ներառվել է առողջապահական համակարգի նպատակային ծրագրերի մեջ: Եվ մենք փուլ առ փուլ, էտապ առ էտապ, սրտի անհետաձգելի վիրահատությունները ազգաբնակչության համար դարձնում ենք պետական պատվերի հեվանավորության ներքո: Ծրագրում ընդգրկվում են այն քաղաքացիները, ովքեր մինչ այս ներառված չեն եղել սրտի անվճար ինվազիվ վիրահատության իրավունք ունեցող որեւէ խմբում: Հաշվի է առնվել այն հանգամանքը, որ մեր երկրում լայն տարածում ունեցող սրտանոթային հիվանդությունները մահացության ընդհանուր կառուցվածքում 48 տոկոս են կազմում եւ որ ստենտավորումն ինֆարկտի դեպքում մարդու կյանքը փրկելու ամենաարդյունավետ միջոցն է: Նշեմ նաեւ, որ սրտի անհետաձգելի բուժօգնության ծրագիր մեջ ներառված անձիք, վեց ամիս անպայման մնալու են տվյալ բկ-ի հսկողության ներքո, եւ նրանք այդ ամիսների ընթացքում ոչ միայն շարունակական հսկողություն են համապատասխան ձեւով իրականացնելու, այլ նաեւ բարդությունների`ռեկորնեզիացիայի դեպքում, եթե ստենտը փակվեց եւ նորից ստենդավորելու հարց եղավ, ապա երկրորդ ստենտը տվյալ բկ-ն դնելու է անվճար:

-Լաբարատոր հետազոտությունը մտնո՞ւմ ենծրագրի մեջ:

- Այո, լաբարատոր հետազոտությունները եւս արվում են անվճար` ծրագրի սահմաններում: Որի մեջ մտնում է կորոնարոգրաֆիա, էլեկտրոսրտագրություն, տրոմբոնինի որոշում, բիոքիմիական անալիզ, արյան ընդհանուր անալիզ, մեզի ընդհանուր անալիզ: Առնվազն իննը մինիմալ հետազոտությունները ներառված են ծրագրի շրջանակներում, որից հետո հիվանդանոցում անհետաձգելի սրտաբանության պատասխանատու բժիշկը որոշում է` ըստ կլինիկո-լաբարատոր հետազոտությունների` տվյալ հիվանդը մտնում է ծրագրի մեջ, թե ոչ: Վերջնական որոշողը դա կլինիսիստն է` որեւէ այլ սոցիալական մակարդակ այստեղ նշանակություն չունի, կարեւոր է բացառապես ախտորոշումը: Այսինքն եթե եղավ սուր ինֆարկտ էստե էլեվացիայով անկախ սոցիալական պատկանելիությունից, հիվանդը մտնում ծրագրի մեջ, այստեղ հավասարված են բոլորը, որովհետեւ խնդիրը անհետաձգելիության` կյանքին վտանգ սպառնալու մեջ է, որի դեպքում բոլորս հավասար ենք:
-Ցանկացած բժշկական կենտրոնում, որտեղ կատարում են սրտի ստենդավորում կարո՞ղ է հիվանդը` հարկ եղած դեպքում դիմել:

-Մենք հուշագիր ենք ստորագրել վեց բժշկական կազմակերպությունների հետ` չորսը տեղակայաված են մայրաքաղաքում, երկուսը մարզերում: Մարզերի հետ կապված մենք այլընտարանք էլ չունեինք, որովհետեւ այս պահի դրությամբ տասը մարզերում գործում են միայն երկու բժշկական կազմակերպություններ, որտեղ հնարավոր է կատարել ստենտավորում` դա Գյումրու բժշկական կենտրոնի սրտաբանական բաժանմունքն է եւ ֆրանս-հայկական սրտաբանական կենտրոնը Գորիսի տարածքում: Երեւանում չորս բկ-ներ են ընտրվել, դրանք են` "Նորք-մարաշ" սրտաբանական կենտրոնը, "Էրեբունին", "Մալաթիա" բկ-ն եւ թիվ մեկ համալսարանական հիվանդանոցի` սրտաբանական բաժանմունքը: Երեք ամիս հետո մենք որոշում կկայացնենք ընդլայնում ենք այս վեց բկ-ների թիվը, թե ոչ:

- Ըստ Ձեզ ծրագիրը նոր կոռուպցիոն ռիսկեր չի՞ պարունակում:

-Մենք հետեւելու ենք, որ հենց սկզբից հիվանդի վիճակը ճիշտ գնահատվի, նվազագույնի հասցվեն հնարավոր բոլոր ռիսկերը եւ ապահովվի քաղաքացու իրազեկությունը: Մեր հանձնաժողովներն ուսումնասիրություններ են իրականացնում կոռուպցիոն ռիսկերը իսպառ վերացնելու համար: Իսկ նախարարին կից մշտադիտարկման խորհուրդը կվերահսկի ծրագրի իրականացման ընթացքն ու որակը:

- Ի՞նչ սկզբունքով եք որոշել քվոտաները:

-Առաջին երեք ամսվա համար առայժմ քվոտա չունենք, քանի որ ծրագիրը նոր է մեկնարկել: Այսինքն այս պահին բոլորը ընդունվում են, քվոտավորվում է այն ժամանակ, երբ մենք որոշակի ժամանակահատված տվյալ ծրագրով աշխատել ենք: Երեք ամիս հետո նոր միայն մենք փորձենք որոշակի քվոտավորում մտցնենք, որի հետ էլ կսահմանենք կարգ:

-Այսինքն, բացառվելու է, որ նույն անհետաձգելի բուժոգնության կարիք ունեցող հիվանդին ասեն, որ քվոտան վերջացել է:

-Արվելու է մաքսիմալը, որ նմանատիպ փոխհարաբերությունների մեջ` ֆինանս-նախարարություն-բկ, հիվանդը չներառվի: Եվ որեւէ մեկը նման հարցից չի տուժելու:

-Հունվարի մեկից մինչ օրս քանի՞ ստենտավորում է արվել ծրագրի շրջանակներում:
- Այս պահի դրությամբ արդեն 89 հիվանդ ծրագրի շրջանակներում ստենդավորվել է:

Տաթեւիկ  Աբրահամյան