ԲՀԿ-ի PR-ն ու այլընտրանքի`այլընտրանքը

Որոշ լրատվամիջոցներ հետևողականորեն լուրեր էին տարածում, թե իբր Վարդենիսի բնակիչները հրաժարվում են ընդունել Գագիկ Ծառուկյան բարեգործական հիմնադրամի օգնությունը: Այդ հրապարակումների մեջ նշվում էին տարբեր անհեթեթ պատճառներ: Այնինչ, իրականությունը բոլորս մեր աչքերով երեկ տեսանք Վարդենիսում և այսօրվա ռեպորտաժում:
Ինձ մնում է ավելացնել մեկ բան: Մեզ այս գործելաոճը ծանոթ է, մենք սովոր ենք: Գագիկ Ծառուկյան բարեգործական հիմնադրամը ֆինանսավորում է դասական երաժշտության համերգներ` հրաժարվում են տրամադրել դահլիճներ և համերգասրահներ, հիմնադրամը որոշում է վճարել ուսանողների ուսման վարձը` ռեկտորները սպառնում են հեռացնել այդ ուսանողներին, սահմանում ենք կրթաթոշակներ` խրախուսելու տաղանդավոր երիտասարդներին՝ տարբեր սպառնալիքներով ստիպում են հրաժարվել, պատրաստակամություն ենք հայտնում օգնել դպրոցներին` վախեցնում են տնօրեններին, մշտապես օգնության ձեռք ենք մեկնում թշնամու գնդակի տակ ապրող սահմանամերձ գյուղերին` մեր հետևից զազրախոսում են, և այսպես շարունակ…
Մենք միշտ, սակայն, աշխատելու և մարդկանց օգնելու տարբերակները գտնում ենք: Որովհետև չկա որևէ ուժ, որը կկարողանա պատնեշ հանդիսանալ Գագիկ Ծառուկյան բարեգործական հիմնադրամի և հայ ժողովրդի միջև:

Իվետա  Տոնոյան 

Զուգահեռ այլընտրանքային իրականություն. սա այն իրականությունն է, որ ներկայացնում են ԲՀԿ-ական լրատվամիջոցները, որոնք բացառում են, որ Հայաստանի որևէ բնակավայրում կարող է գտնվել մարդ, ում համար Գագիկ Ծառուկյանի անձը պաշտամունքի առարկա կարող է և չլինել,  և ով պարզապես կարող է հրաժարվել Գագիկ Ծառուկյանի կողմից առաջարկվող օգնությունից՝ գերադասելով օգնություն ստանալ Կառավարությունից: Բայց արի ու տես, որ նման մարդիկ իրականում քիչ չեն, որքան էլ որ ԲՀԿ-ական լրատվամիջոցներն ու ԲՀԿ-ի PR-ով  զբաղվողները փորձեն այլ  պատկեր ստեղծել ու  ներկայացնել:
Իհարկե, հասկանալի է, որ Ծառուկյանի թիմակիցների համար ավելի հիմնավոր  պետք է լինեն   սեփական հեռուստաընկերության  ռեպորտաժները, քան, իրականությունը: Իսկ իրականությունը հաճախ հիասթափեցնող է լինում՝ համենայնդեպս ԲՀԿ-ի հետևորդների համար, քանի որ, մեղմ ասած, ոչ բոլորն են, որ ապրում են  օլիգարխիկ կուսակցության կողմից   օգնություն ստանալու երազանքներով: Չէ՞ որ մարդիկ այնուամենայնիվ այլընտրանք ունեն՝ որքան էլ  որ  <այլընտրանքը>  պնդի, թե իրենց   այլընտրանք   չկա:

Իսկ  Իվետա Տոնոյանն այս պատմության մեջ ամենեւին մեղավոր չէ, մեղավորը` ԲՀԿ-ի  որոշ <սազանդարներն>  են  որոնց թվում է, որ իրենց  բան ու գործը ոչ թե օրենսդիր գործունեությամբ զբաղվելն է, այլ տարատեսակ <տուսովկաների>  մեջ քիթները <խցկելը>...

Արտյոմ  Եդիգարյան