«Գնելն է կատարել այդ սպանությունը, նա դանակով հարվածել է, և խեղդել մնացածի հետ»

Ավան և Նոր-Նորք վարչական շրջանների ընդհանուր իրավասության դատարանում Վազգեն Սարգսյանի անվան ռազմական ինստիտուտում այս տարվա հունվարի 29-ին դաժանորեն սպանված կուրսանտ Հայկազ Բարսեղյանի գործով դատական նիստը կրկին հետաձգվեց։

Այս անգամ պատճառը ամբաստանյալներից Մովսես Ազարյանի պաշտպանի բացակայությունն էր։ Սպանված կուրսանտ Հայկազ Բարսեղյանի հայրը՝ Արկադի Բարսեղյանը կարծում է, որ դատական նիստերի հետաձգման հիմնական նպատակը մեկն է՝ ցանկանում են այս տարի ոչ մի դատական նիստ չիրականացնել։ Այնուհետև խոսելով դեպքի մասին, Ա Բարսեղյանը Fnews.am-ի հետ զրույցում  ասաց. «Գնելն է կատարել այդ սպանությունը, նա դանակով հարվածել է,  և խեղդել մնացածի հետ։ Դա աբսուրդ է, ամենավերջին մարդը պետք է լինես, որ այդպիսի հայտարարություն անես։ Սպանության օրը նույնիսկ այնտեղ կուրսանտներ կան, ասում են՝ երբ իմացա Հայկազին գտել են պտտաձողից կախված, ես վազելով գնացի այնտեղ, նրա կանգնած դիրքը տեսա, միանգամից հասկացա,  որ դա սպանություն է։ Այդ 18 տարեկան կուրսանտը հասկանում է, որ սպանություն է եղել, իսկ ինքը՝ փաստաբան լինելով․․․ էլի թող պաշտպանի, բայց թող դատարանը վճիռ կայացնի, մեղավոր է իր պաշտպանյալը, թե ոչ»:

Հորը զարմանք է պատճառել նաեւ այն հանգամանքը,  որ մինչ  օրս  Գնել Թորոսյանի հորը չեն ձերբակալել, կամ էլ գործում սպաների, կամ ինստիտուտում աշխատող զինվորականների չեն ներգրավվել։ «Ոչ մի սպա, ոչ ոք չձերբակալվեց, պատասխանատվության չենթարկվեց, ուղղակի աշխատանքներից ազատվեցին, տեղափոխվեցին և վերջ։ Գնդապետը՝ Զարմիկ Մարկոսյանը, մինչև հիմա ազատության մեջ է, ինքը բոլոր արտոնությունները ստեղծել է իր որդու համար, նույնիսկ այնտեղ ճաշարան չի գնացել, շատ հազվադեպ է եղել այնտեղ, մեքենայով մտել է ներս հելել, նույնիսկ քաղաքացիական շորերով է եղել, այդքանից հետո նրան ոչ մի պատասխանատվության չեն ենթարկել, նա ամեն ինչն էլ իմացել է»․-եզրափակեց Արկադի Բարսեղյանը։

Հիշեցնենք, որ հունվարի 29-ին՝ ժամը 06:35-ի սահմաններում, հայտնաբերվել էր Հայկազ Բարսեղյանը՝ պտտաձողի վրա պարանով կախված վիճակում: ՀՀ քննչական կոմիտեում հարուցված քրեական գործով մեղադրանք է առաջադրվել Հ. Բարսեղյանի 4 համածառայակցի: Նույն զորամասի զինծառայողներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Դեպքից հետո հարուցվել է նոր քրեական գործ՝ ՀՀ քրեական օրենսգրքի 375-րդ հոդվածի 1-ին մասի հատկանիշներով։