100 տարի էլ պետք ա նստեմ՝ սպասե՞մ. Կայարանցի Թևոսիկի եղբոր սպանության մեջ մեղադրվողը դժգոհ է

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր հերթական անգամ հետաձգվեց քրեական հեղինակություն Կայարանցի Թևոսիկի եղբոր՝ Արթուր Սաֆարյանի սպանության գործով դատական նիստը: Բանն այն է, որ նիստին չէր ներկայացել տուժողի իրավահաջորդի ներկայացուցիչ Թադեւոս Ալեքսանյանն ու դատակոչված վկաները: Դատախազ Արմեն Փանոսյանը միջնորդեց հետաձգել դատական նիստն ու վկաներին կրկին ծանուցել :

Նիստը նախագահող դատավոր Արմեն Բեկթաշյանը տեղեկացրեց՝ քանի որ վկաները պատշաճ չեն ծանուցվել, ուստի նրանց նկատմամաբ բերման որոշում չի կարող կայացնել :

Նիստի հետաձգումը կարծես թե նյարդայնացրեց գործով ամբաստանյալ Իսրայել Սարգսյանին և նա այդ կապակցությամբ դժգոհեց. «Սենց քանի՞ տարի պետք է տևի, ինձ անիմաստ տեղը բերել հասցրել են էստեղ, մի 100 տարի էլ պետք ա նստեմ՝ սպասեմ՝ ի՞նչ ա լինելու»:

Հիշեցնենք, որ Իսրայել Սարգսյանը՝ մեղադրական եզրակացության համաձայն կազմակերպել եւ օժանդակել է Մովսես Ներսիսյանի կողմից Արթուր Սաֆարյանի սպանության կատարմանը, ապա այդ հանցանքը թաքցնելու նպատակով ապօրինաբար, դիտավորությամբ զրկել է կյանքից Մովսես Ներսիսյանին, բացի այդ` ապօրինի ձեռք է բերել եւ կրել է հրազեն հանդիսացող «ՏԿ» մոդելի ատրճանակ ու ռազմամթերք հանդիսացող` 3 հատ 5.6 մմ տրամաչափի փամփուշտներ, նաեւ ապօրինի ձեռք է բերել ու իր փաստացի բնակության վայր` ք. Երեւան Կոմիտասի պող. 27/1 շենքի բն. 7 հասցեին հարող տարածքում գտնվող ավտոտնակում առկա երկաթյա պահարանում պահել ռազմամթերք հանդիսացող` նպատակային օգտագործման համար պիտանի, գործարանային արտադրության «ԷԴՊ» տեսակի էլեկտրական թով 4 հատ ճայթիչներ եւ նետողական պայթուցիկ նյութերի շարքին դասվող` գործարանային արտադրության դեղնաշագանակագույն եւ շագանակագույն գլանաձեւ արկային վառոդի` թվով 5 հատ հատիկներ»: Հաջորդ դատական նիստը կկայանա մայիսի 22-ին