100-րդ տարելիցի միջոցառումներով իրական հիմքեր ստեղծվեցին պայքարի հաջորդ փուլի համար. պատգամավորներ

Հայոց ցեղասպանության 100-րդ տարելիցի ապրիլքսանչորսյան միջոցառումներով իրական հիմքեր ստեղծվեցին պայքարի հաջորդ փուլ մտնելու համար. Tert.am-ի հետ զրույցում ասաց ԱԺ «Հայ Յեղափոխական Դաշնակցություն» խմբակցության ղեկավար Արծվիկ Մինասյանը:
 

«Իսկ պայքարի հաջորդ փուլն այն է՝ ոչ միայն ճանաչում, այլ նաև զղջման պահանջ,  ժխտողականության դեմ պայքար, բնականաբար արդարության վերականգնում՝ հատուցման սխեմաների միջոցով»,-ասաց Մինասյանը:
 

Բացի այդ նա նկատեց, թե այս տասնօրյակում ամրապնդվեց միջազգային  հանրության այն վստահությունը, որ ցեղասպանության ճանաչումն այլընտրանք չունի: 
 

«Եվ վերջապես երրորդ գործոնն այն էր, որ ամբողջ այս գործընթացով համահայկական ներուժի համախմբման իրական դրսևորում եղավ»,-ասաց նա: 
 

Հարցին, թե կոնկրետ իրավական առումով այս միջոցառումներն ու միջազգային կառույցների ու երկրների կողմից ընդունված բանաձևերն ի՞նչ տվեցին Հայոց ցեղասպանության ճանաչման գործընթացին, Արծվիկ Մինասյանը նշեց. «Եթե նկատի ունենք այն բոլոր պահանջները, որ պետք է դրվեին Թուրքիայի ներկա պետության առաջ, ապա ակնհայտ է, որ ուժեղացան բոլոր այդ հիմքերը, որպեսզի այն թղթածրարը, որ պետք է պատրաստվի այդ ուղղությամբ, ավելի իրավական և ուժեղ հիմնավորումներ ունենա»: 
 

Իսկ թե կա՞ քայլերի հաջորդականություն արդեն ապրիլի 24-ից հետ, ՀՅԴ պատգամավորը նշեց, թե դրանք աստիճանաբար ուրվագծվում են:
 

«Քանի որ մենք խոսում ենք այլևս ՀՀ իրավատեր սուբյեկտի մասին, ապա այո, կարծում եմ, որ այդ գործողությունները նաև դրվում են կայուն հիմքերի վրա: Ամենևին խոսք չի գնում, որ պետությունը դարձել է այլևս այն սուբյեկտը,  որ պահանջ է դնում Թուրքիային հատուցման  շրջանակներում, ոչ, բայց որպես իրավատեր՝ ուրվագծվում են այդ քայլերը, և վստահ եմ, որ այս 100-րդ տարելիցի միջոցառումները լրացուցիչ խթան են հանդիսանում հայոց պետականության հարցում դերակատարությունը մեծացնելու և պետության մասնակցությունը ապահովելու գործում»,-նշեց նա:
 

«Բարգավաճ Հայաստան» խմբակցության ղեկավար Նաիրա Զոհրաբյանը Tert.am-ի հետ զրույցում նկատեց, թե այն, ինչ տեղի  ունեցավ այս տասնօրյակում, ուղղակիորեն լրջագույն բեկում բերեց Հայոց ցեղասպանության ճանաչման առումով:

«Վստահ եմ, որ չկա որևէ պետություն, անգամ այն պետությունները, որոնք չեն ճանաչել Հայոց ցեղասպանությունը չեն համարում, որ 1915թ-ին տեղի ունեցածը ցեղասպանություն չէր,  ուղղակի չեն ճանաչում, որովհետև քաղաքական ու տնտեսական կապերով շաղկապված են Թուրքիայի հետ»,-ասաց նա:

Նաիրա Զոհրաբյանը նախ և առաջ կարևոր է համարում ունենալ հետագա քայլերի ճանապարհային քարտեզը:

Մանրամասները ` Tert.am-ում