15 հոգուց բաղակացած խումբը կուսումնասիրի Մերիի մահվան պատճառները

Մերի Մարգարյանի հոր՝ տուժողի իրավահաջորդի ներկայացուցիչ Մարինե Թովմասյանը Fnews.am-ին տեղեկացրեց, որ փոձագետների խումբը արդեն պատրաստ է և շուտով կսկսեն գործի քննությունը: 
«15 հոգուց է բաղկացած, այժմ սպասում ենք, թե որ  օրը  կնշանակեն և սկսեն գործի ծանոթացման փուլը, որից հետո արդեն փորձաքննության օրը կորոշվի»,-ասաց Թովմասյանը` հավելելով, որ այդ փորձաքննությունից հետո շատ բան պարզ կլինի: Փաստաբանը տեղեկացրեց, որ վարույթն իրականացնող մարմինը թույլատրել է իրենց մասնակցելու փորձաքննությանը: «Ամեն ինչ շատ դանդաղ է ընթանում, այս ամենը չպետք է չձգձգեին, իսկ իրենք ձգձգում են, այս ամենն ինչը պետք է շատ արագ լիներ, բայց մինչ օրս որևէ տեղեկություն չկա, թե երբ է տեղի ունենալու այդ փորձաքննությունը:Առ   այսօր ոչինչ չի արվել»,- ասաց Մարինե Թովմասյանը:

Հիշեցնենք, որ Մերի Մարգարյանի հարազատները կատարվածի մեջ մեղադրում են հենց «Շենգավիթ» բժշկական կենտրոնի բժշկուհի Շուշանիկ Բախշյանին, ում մոտ էլ հաշվառված է եղել 26-ամյա կինը: Մերի Մարգարյանի եղբոր պատմելով՝ քույրը 4 օր շարունակ բարձր ջերմություն է ունեցել, սակայն բժշկուհին հրաժարվել է հոսպիտալացնել: Հարազատները նրան տեղափոխել են «Էրեբունի» ԲԿ, որտեղ անմիջապես կեսարյան հատում են արել: Հուլիսի 29-ին նա մահացել է, իսկ հուլիսի 30-ին կեսօրին մահացել է նաեւ ծննդկանի նորածին դուստրը:Դեպքի առթիվ օգոստոսի 3-ին հարուցվել է քրեական գործ` ՀՀ քրեական օրենսգրքի 130-րդ հոդվածի 2-րդ մասի հատկանիշներով: Ըստ Քննչական կոմիտեի տարածած հաղորդագրության՝ «Շենգավիթ» ԲԿ-ի բժշկուհի Շուշանիկ Բախշյանը ցուցաբերել է անբարեխիղճ վերաբերմունք, ինչի հետեւանքով հղիության 35-րդ շաբաթում գտնվող Մերի Մարգարյանը մահացել է: