2 շաբաթում հանրային տրանսպորտից օգտվող ուղևորների 3,4%–ն է էլեկտրոնային վճարում կատարել

Երևանում հանրային տրանսպորտից օգտվող ավելի քան 3,7 մլն ուղևորից միայն 3,4 տոկոսն է 2 շաբաթում օգտվել միասնական տոմսային համակարգից։ Այս մասին Երևանի քաղաքապետարանի գործակարգավարական խորհրդակցության ժամանակ հայտարարեց «Երևան ավտոբուս» ՓԲԸ տնօրեն Բեգլար Կիրակոսյանը։

«Հաշվետու երկու շաբաթվա ընթացքում 3 մլն 742 հազար 435 ուղևորից միասնական տոմսային համակարգից օգտվել է 126 հազարը կամ 3,4 տոկոսը։ Նոյեմբերի 1-ին 316 782 ուղևորից էլ օգտվել է 52 153, իսկ նոյեմբերի 2-ին` 231 523 ուղևորից օգտվել է 50 837 ուղևոր։ Նոյեմբերի 3-ին` 176 579 ուղևորից էլ միասնական տոմսային համակարգից օգտվել է 46 134-ը»,– նշեց Կիրակոսյանը։

Նրա խոսքով` 67 երթուղում նախատեսված 7874-ի փոխարեն փաստացի սպասարկել է 7102 շարժակազմ։ Տեղի է ունեցել 78 ճանապարհատրանսպորտային պատահար, որից 2-ի դեպքում եղել են նաև մարմնական վնասվածքներով ուղևորներ։
Նշենք, որ նոյեմբերի 1-3-ն ընկած ժամանակահատվածում ավտոբուսներում դեպքեր են եղել, երբ վալիդատորները չեն աշխատել, իսկ ուղևորների մոտ չի եղել 100 դրամանոցներ։ Փոխքաղաքապետ Սերգեյ Գրիգորյանը հայտնեց, որ այդ թերությունների համար ներողություն են խնդրում ու փորձում են հնարավորինս արագ կարգավորել դրանք։

Նա նաև ընդգծեց, որ շաբաթ–կիրակի օրերին միասնական տոմսային համակարգով վճարման հասույթը 4 և 5 մլն դրամով ավելացել է։