25.8 միլիոն դրամ Հովիկ Աբրահամյանին Մոսկվա հասցնելու համար

ՀՀ վարչապետ Հովիկ Աբրահամյանի գլխավորած կառավարական պատվիրակությունը Քուվեյթի վարչապետի հրավերով մարտի 11-ին երկօրյա պաշտոնական այցով մեկնեց Քուվեյթ, հետո գնաց Եգիպտոս, իսկ դրանից հետո, թե ու՞ր կգնա՝ հայտնի չէ:

Քանի որ դեռևս հնարավոր չէ պարզել, թե որքա՞ն կարժենա նման շրջագայությունը՝ Slaq.am-ը կներկայացնի, թե որքան է եղել նախորդ շրջագայությունը գինը:

Աբրահամյանի գլխավորած կառավարական պատվիրակությունը փետրվարի 5-ին երկօրյա աշխատանքային այցով մեկնեց Մոսկվա՝ մասնակցելու փետրվարի 6-ին կայանալիք Եվրասիական միջկառավարական խորհրդի նիստին, իսկ այցի շրջանակում մեծ դժվարությամբ, ռուսերենով, զրույց ունեցավ ՌԴ վարչապետ Դմիտրի Մեդվեդևի հետ: Այլ առիթով դեռ կանդրադառնանք Աբրահամյանի Մոսկվա կատարած այցի արդյունավետությանը, իսկ այժմ այն մասին, թե որքան գումար ՀՀ հարկատուները վճարեցին, որպեսզի Հովիկ Աբրահամյանը հասնի Մոսկվա և անփորձանք վերադառնա հայրենիք:

ՀՀ կառավարության աշխատակազմի համար հատուկ չվերթի ծառայությունների մատուցման գնման պայմանագրից տեղեկանում ենք, որ Կառվարության աշխատակազմը «Ավիաուսումնական կենտրոն» ՓԲԸ-ի հետ կնքել է A-319 ինքնաթիթով Երևան-Մոսկվա և Մոսկվա-Երևան 4 ժամ 50 րոպե տևողությամբ թռիչքի գործարք: Պայմանագրի ընդհանուր կազմում է 25 միլիոն 800 հազար դրամ:

Ուշագրավ է, անշուշտ, թե ինչո՞ւ պետք է 25.8 միլիոնանոց լինի վաչապետի թռիչքը, ինչո՞ւ Էյերբաս А319-ով և «ինչուների» մեծ շարք:

Եթե կառավարությունն ամեն գնով գաղտնի չպահի Հովիկ Աբրահամայնի Քուվեյթ և Եգիպտոս կատարած այցերի հետ կապված գնման պայմանագրերը՝ ապա մենք դրանք էլ կներկայացնենք մեր ընթերցողներին: