27-ամյա երիտասարդին մեղադրանք է առաջադրվել մորը սպանելու համար

Հուլիսի 19-ին Նոր Արեշի տներից մեկում կատարված դանակահարության դեպքի առթիվ հարուցված քրեական գործով 27-ամյա երիտասարդին մեղադրանք է առաջադրվել։ Այս մասին «Փաստինֆո»-ն տեղեկացավ Քննչական կոմիտեի տեղեկատվության եւ հասարակայնության հետ կապերի բաժնի պետի պաշտոնակատար Նաիրա Հարությունյանից։

Վերջինս հայտնեց, որ մեղադրանքն առաջադրվել է 34-104-րդ հոդվածի 2-րդ մասի 1-ին կետով, այն է՝  երկու կամ ավելի անձանց սպանության փորձը. «Երիտասարդի նկատմամբ որպես խափանման միջոց է ընտրվել կալանավորումը»,- նշեց Հարությունյանը։

Ավելի վաղ «Փաստինֆո»-ն հայտել էր, որ 27-ամյա տղան դանակի հարվածներ է հասցրել հորն ու մորը, այնուհետև՝ վնասել ինքն իրեն։ Նրա հասցրած դանակի հարվածների հետևանքով մայրը մահացել է, իսկ հայրը տեղափոխվել է Էրեբունի բժշկական կենտրոն։

Ոստիկանության հաղորդմամբ՝ հուլիսի 19-ին՝ ժամը 03։30-ի սահմաններում, ԱԻՆ «911» ծառայություն է զանգահարել Նոր Արեշի 16-րդ փողոցի մի բնակիչ և հայտնել, թե տղան հոգեկան հիվանդ է. դանակը վերցրել և մտել է սենյակ, ու վախենում է, որ իրեն կվնասի։

Ավելի ուշ «Էրեբունի» բժշկական կենտրոնից հաղորդում է ստացվել, որ «կրծքավանդակի կտրած-ծակած վերքեր» ախտորոշմամբ շտապօգնության խումբը բուժօգնության է տեղափոխել Նոր Արեշի 16-րդ փողոցի բնակիչ, 59-ամյա մի տղամարդու: Նա հայտնել է, որ տանը տեղի է ունեցել դանակահարություն:

Եվս հինգ րոպե անց նույն բժշկական կենտրոնից նոր հաղորդում է ստացվել. «կրծքավանդակի կտրած-ծակած վերքեր» ախտորոշմամբ, նույն հասցեից, իրենց մոտ է տեղափոխվել 61-ամյա կնոջ դիակ:

Ոստիկանության Էրեբունու բաժնից մեկնած օպերատիվ խումբը պարզել է, որ տղան խոհանոցային դանակով հարվածել և մարմնական վնասվածքներ է պատճառել մորն ու հորը, հետո վնասել է ինքն իրեն և դիմել փախուստի: Ոստիկաններին հաջողվել է դեպքի վայրին հարակից տարածքում հայտնաբերել տղային և ժամը 04.55-ին նրան տեղափոխել հիվանդանոց, որտեղ ախտորոշվել են «պարանոցի կտրած-ծակած վերքեր։

Ըստ քննության նախնական տվյալների՝ ընտանիքում եղել է վիճաբանություն կենցաղային հարցի  շուրջ։