300 000 դոլար՝ մեկ ընթրիքի համար

Lragir.am-ը գրում է.

Անխախտ ավանդույթ է դարձել՝ չի լինում զանգվածային որևէ մեծ միջոցառում կամ հասարակության ուշադրության կենտրոնում գտնվող որևէ իրադարձություն, որի կենտրոնում ՀՀԿ-ն չլինի կամ իսկույն այնտեղ չհայտնվի: Հասարակությունը դեռ չի հասցրել մարսել ՀՀԿ կանանց գվարդիայի «սելֆիները» Ծիծեռնակաբերդում: Ու հիմա պարզվում է  ՀՀԿ-ի զինանոցը ոչ միայն անսպառ է, այլև՝ բազմազան: Նժդեհականների, այս դեպքում երիտնժդեհականների ներաշխարհն այս անգամ տակնուվրա է արել Հայաստան ժամանած Քիմ Քարդաշյանը: 

Մարիոթ հյուրանոցում մի փոքր հանգստանալուց հետո, երեկ Քիմ Քարդաշյանն ու նրան ուղեկցողները ընթրել են Հյուսիսային պողոտայում գտնվող Պրովանս ռեստորանում: Ու նրանց հետ եղել է ԱԺ պատգամավոր Լևոն Մարտիրոսյանը, ով ըստ տեղեկությունների երկժամանոց ընթրիքի համար Քիմ Քարդաշյանին վճարել է ընդամենը 300 000 դոլար: Սա, իրականում, Քիմ Քարդաշյանի կողմից ազգասիրության մեծ դրսևորում է: 

Իհարկե, նժդեհականների հին գվարդիայում կգտնվեին մարդիկ, ովքեր հանուն ազգային նպատակների և Ցեղասպանության զոհերի հիշատակի կվճարեին շատ ավելին, ինչպես վերջերս դա արել էր Սաուդյան Արաբիայի արքայազնը՝ վճարելով 1 միլիոն դոլար, (http://www.dailymail.co.uk/news/article-2871278/Kim-Kardashian-offered-1million-spend-evening-partying-Saudi-Arabian-prince.html): Փաստորեն, դեռ  նույնիսկ Արարատը չտեսած, Քիմ Քարդաշյանն իր հայրենակիցների համար, որպես նախնիների հոգու կանչ, հայտարարել է  70 % զեղչ: 

Ի միջի այլոց, Քիմը սխալվել է՝ տուրք տալով իր հայրենասիրական զգացմունքներին, հավանաբար մտածելով, որ Հայաստանն աղքատ երկիր է, և չարժե սաուդի-արաբական գներ կրակել: Վստահաբար, այս մի քանի օրերին, տեսնելով իր երկրպագու հայ օլիգարխների ներաշխարհի խռովքը, Քիմը կհասկանա, որ իրեն խաբել են, ու հաստատ կվերանայի հայտարարված զեղչերը:

Մանրամասները՝ սկզբնաղբյուր կայքում