Ա. Աբրահամյանը առանց որեւէ բան ճշտելու, ասաց, որ ավելի լավ է ես դիմում գրեմ

Նախորդ շաբաթ օրը սկանդալային հրաժարական է տեղի ունեցել Ռուսաստանի հայերի միությունում: Ռուսաստանի հայերի միության կառավարման խորհրդի անդամ, գեներալ-լեյտենանտ Նորատ Տեր-Գրիգորյանցը, ով մեծ ներդրում է ունեցել հայոց բանակի հիմնադրման եւ արցախյան ազատամարտի հաղթանակի գործում, հայտարարել է, որ Ռուսաստանի հայերի միությունից հրաժարական է տալիս, զուտ այն բանի համար, որ Արա Աբրահամյանը, այս ու այն կողմ իր մասին մեղադրանքներ է հնչեցնում: Թե մասնավորապես ինչ մեղադրանքներ է հնցեցրել Ռուսաստանի հայերի միության նախագահ Արա Աբրահամյանը գեներալ-լեյտենանտ Նորատ Տեր-Գրիգորյանցին հասցեին, fnews.am-ը փորձեց պարզել անձամբ գեներալից, ով մեզ հետ զրույցում ասաց հետեւյալը.

-Նախ ասեմ, որ ես Ռուսաստանի հայերի միությունից հրաժարական եմ ներկայացրել դեկտեմբերի 13-ին: Այս տարիների ընթացքում իմ եւ Արա Աբրահամյանի հարաբերությունները մշտապես շատ ջերմ եւ ընկերական եղել, բայց, այս քանի օրը, որոշ մարդկանց պատճառով, ովքեր իմ խոսքերը աղավաղված ձեւով ներկայցրել են Աբրահամյանին, մեր հարաբերությունների մեջ սառնություն է մտել: Իմ միությունից դուրս գալու միակ ու հիմնական պատճառը Արա Աբրահամյանի՝ իմ հասցեին հնչեցված սուտ մեղադրանքներն են:

-Ի՞նչ սուտ մեղադրանքների մասին է խոսքը պարոն Տեր-Գրիգորյանց:

-Վերջերս ես` որպես զինված ուժերի գեներալ, եւ ՙԱրեւմտահայերի ազգային կոնգրեսի՚ ներկայացուցիչ, հանդիպում եմ ունեցել ԼՂՀ հայ ուսանողների հետ, որտեղ ուսանողներից մի քանիսը առաջարկեցին ստեղծել նոր կազմակերպություն, որը հայ ուսանողներին տեղյակ կպահի, թե Ռուսասատանում գործող հայկական կազմակերպություններից, որն  ինչով է զբաղվում: Քանի որ կան բազմաթիվ հայկական կազմակերպություններ, որոնք պարբերաբար ինչ-ինչ միջոցառումներ, կլոր սեղաներ են կազմակերպում, որի մասին ոչ բոլորն են տեղյակ լինում: Ես երիտասարդներին պատասխանեցի, որ իհարկե հնարավոր է, եւ երբ ունենան հստակ ծրագիր կարող են ներկայացնել եւ ես կաշխատեմ հնարավորինս աջակցել: Այս խոսակցությունը անմիջապես լրիվ այլ ֆոնի վրա ներկայացվել էր Արա Աբրահամյանին: Աբրահամյանին պատմել էին, թե իբր ես հավաք եմ կազմակերպել երտասարդների շրջանում եւ ցանկանում եմ Արա Աբրահամյանի դեմ նոր կազմակերպություն հիմնել: Իսկ Արա Աբրահամյանը առանց որեւէ բան լսելու, առանց ճշմարտությունն իմանալու, ասաց, որ եթե նման խոսակցություներ են շրջանառվում, ավելի լավ է ես դիմում գրեմ եւ լքեմ միության շարքերը: Ես էլ առանց երկար մտածելու, անմիջապես գրեցի միությունից դուրս գալու դիմումը, քանի որ չասված, չարված բաների համար ես որեւէ որեւէ մեկի մոտ արդարանալու որեւէ բան չունեմ: Չնայած ես միության շարքերը լքել եմ, բայց ես էլի շատ հարգում եւ ընդունում եմ Աբրահամյանին,պարզապես, կան մարդիկ, ովքեր սովոր են ստահոդ տեղեկություններ տարածել մարդկանց  հասցեին, դրանում Աբրահամյանը մեղավոր չէ:

Նոնա ԱԴԱՄՅԱՆ