ԱԱԾ-ն առանձնապես խոշոր չափի կեղծ թղթադրամներ է հայտնաբերել

Կառավարությանն առընթեր Ազգային անվտանգության ծառայությունը վերջերս առանձնապես խոշոր չափերով՝ շուրջ 3 կգ քաշով «ափիոն» տեսակի թմրամիջոցի մաքսանենգության դեպք էր կանխել: Իրանի քաղաքացին, թմրամիջոցը նետելով հայ-իրանական սահմանագծով, փոխանցել էր Հայաստանի 2 քաղաքացիների, ովքեր փորձել էին իրենց ավտոմեքենայով տեղափոխել այն, սակայն բռնվել էին ԱԱԾ աշխատակիցների կողմից։

ԱԱԾ մամուլի ծառայությունից հայտնել են, որ թմրամիջոցների մաքսանենգության և ապօրինի շրջանառության հատկանիշներով հարուցված քրեական գործով որպես մեղադրյալներ ներգրավված Հայաստանի քաղաքացիներ Գ.Հ-ի և Է.Հ-ի մոտ հայտնաբերվել էր նաև 14.800 դոլար ընդհանուր արժեքով 148 հատ 100 դոլարանոց թղթադրամներ: Փորձագետի եզրակացության համաձայն` դրանք կեղծված են, չեն համապատասխանում ԱՄՆ ստանդարտ թողարկման «100» դոլար անվանական արժեքով թղթադրամի կատարման եղանակին և պաշտպանական հատկանիշներին:

Քրեական գործով իրականացված լայնածավալ քննչական գործողությունների և օպերատիվ-հետախուզական միջոցառումների արդյունքում պարզվել է, որ նշված կեղծված թղթադրամները Է.Հ-ին իրացրել է Ագարակի բնակիչ Հ.Բ-ն, որի ավտոմեքենայի խուզարկության ընթացքում հայտնաբերվել է ևս 1700 դոլար արժողությամբ կեղծված թղթադրամներ:

Թմրամիջոցների մաքսանենգության և ապօրինի շրջանառության հատկանիշներով հարուցված քրեական գործի նյութերով հարուցվել է նոր քրեական գործ՝ ՀՀ քրեական օրենսգրքի 202-րդ հոդվածի 3-րդ մասի 2-րդ կետի հատկանիշներով («Առանձնապես խոշոր չափերով կեղծ փողեր պատրաստելը, պահելը և իրացնելը»): Հ.Բ-ին առաջադրվել է մեղադրանք, նրա նկատմամբ որպես խափանման միջոց կիրառվել է կալանավորումը:

Նախաքննությունը շարունակվում է, միջոցներ են ձեռնարկվում կեղծված փողերի ծագման աղբյուրը և հանցանքին հնարավոր առնչակից անձանց բացահայտելու ուղղությամբ: