Աչքի տեսողությունը կորցրած Հարութ Զաքարյանը հարցաքննվել է.նրան կրկին տեղափոխում են Մոսկվա

Երեկ հարցաքննվել է մայիսի 2-ին Գորիսի «Սդղի գյոլ» կոչվող տարածքում Սյունիքի մարզպետ Սուրիկ Խաչատրյանի որդու մասնակցությամբ տեղի ունեցած ծեծկռտուքից աչքի տեսողությունը կորցրած Հարութ Զաքարյանը: Այս մասին «Առաջին լրատվական»-ի հետ զրույցում ասաց Հարութ Զաքարյանի հայրը՝ Գագիկ Զաքարյանը:

Վերջինս հավելեց, որ ինքը ներկա չի եղել հարցաքննությանը, սակայն վստահ է, որ որդին ամենայն մանրամասնությամբ պատմել է կատարվածը, այդ թվում՝ այն, որ Սուրիկ Խաչատրյանի որդին՝ Տիգրան Խաչատրյանն է կատարվածի գլխավոր կազմակերպիչը: «Հիմա Հարութը ցուցմունք է տվել, ու ես կարծում եմ, որ շատ արագ մեղադրանք կառաջադրվի նաև Հարութի մասով, Հարութին ծեծլու մասով»,- ասաց հայրը:

Նշենք, որ մինչ Հարութ Զաքարյանի հարցաքննությունը գործի քննությունը կառուցվում է միայն ծեծից առավել թեթև վնասվածքներ ստացած եղբոր՝ Մուշեղ Զաքարյանի մասով:

Գործում ներգրավված անձինք, այդ թվում՝ Սուրիկ Խաչատրյանի եղբորորդիներ Էյներ և Մայիս Խաչատրյանները և ևս 4 հոգի մեղադրվում են Մուշեղ Զաքարյանին հարվածներ հասցնելու համար: «Կատարված քննչական գործողությունների արդյունքում բավարար ապացույցներ են ձեռք բերվել առ այն, որ Մուշեղ Զաքարյանի նկատմամբ կիրառված բռնություններին մասնակցել է նաև քաղաքացի Էյներ Խաչատրյանը։

Նախնական քննության արդյունքներով՝ մայիսի 2-ին «Սդղի գյոլ» կոչվող տարածքում առաջացած վիճաբանության ժամանակ մի խումբ անձինք ծեծել են Մուշեղ Զաքարյանին՝ պատճառելով մարմնական վնասվածքներ, որի ժամանակ Էյներ Խաչատրյանը ևս ձեռքերով և ոտքերով հարվածներ է հասցրել նրա մարմնի տարբեր մասերին», – ասված է Քննչական կոմիտեի օրերս տարածված հաղորդագրությունում։

Էյներ Խաչատրյանին հուլիսի 14-ին մեղադրանք է առաջադրվել Քրեական օրենսգրքի 118-րդ հոդվածի հատկանիշներով՝ ծեծելը կամ այլ բռնի գործողություններ կատարելը։ Սակայն նրա նկատմամբ որպես խափանման միջոց է ընտրվել չհեռանալու մասին ստորագրությունը։ Նույն՝ 118-րդ հոդվածով մեղադրանք է առաջադրվել նաև մյուսներին:

Գագիկ Զաքարյանն այսօր մեզ հետ զրույցում հույս հայտնեց, որ շատ արագ մեղադրանքները կվերաշարադրվեն, ու Սուրիկ Խաչատրյանի որդին էլ վկայից կդառնա մեղադրյալ: «Այո՛, չկասկածեք: Բացառված բան է, որ նա անպատիժ մնա»,- ասաց հայրը:

Ի դեպ, Հարութի հայրը նշեց, որ վաղը կրկին Հարութին պետք է տանի Մոսկվա, քանի որ ԱՄՆ-ից հատուկ մասնագետ է ժամանում, և նա պետք է Հարութին հետազոտի ու որոշակի վիրահատական միջամտություն անի: Բանն այն է, որ նախորդ անգամ Մոսկվայից Հայաստան տեղափոխելիս Հարութի աչքի եղջերաթաղանթը պայթել էր, ու հիմա վիրահատական միջամտություն է անհրաժեշտ: «Հիմա ես ինքնաթիռի տոմսերով եմ զբաղված, ու պետք է շատ արագ Հարութին հասցնեմ Մոսկվա, քանի որ այդ պրոֆեսորը երկար չի մնալու Մոսկվայում: Ես պետք է հասցնեմ»,- ասաց հայրը: