Ադրբեջանական հարձակվողական տրամադրությունն ալիեւյան հերթական «բլեֆն» է

Վերջին օրերին հայ-ադրբեջանական շփման գծում լարումը, հասարակության ստվար զանգվածի մոտ լուրջ մտահոգության առիթ է դարձել: Ակտիվորեն քննարկվում է պատերազմի վերսկսման թեման: Հասկանալու համար, թե արդյո՞ք երկարատեւ հրադադարից հետո, կողմերն այնուամենայնիվ կանցնեն ռազմական գործողությունների, fnews.am-ը զրուցեց Ղարաբաղյան թոհուբոհի միջով անցած, Արցախյան պատերազմի հերոս, Արկադի Տեր-Թադեւոսյանից՝ Կոմանդոսից.
-Ադրբեջանական կողմի կրակոցները գնալով հաճախակի են դառնում, ի՞նչ է սա նշանակում, արդյո՞ք նման պահվածքը կապված է Հայաստանի՝ Մաքսային Միությանն անդամակցելու հետ:
-Ոչ մի նոր բան չկա ադրբեջանի պահվածքի մեջ: Կարոծում եմ, ընդդիմությունն ինչքան երկար տեւի, այնքան ադրբեջանցիներն ավելի շատ են լարվելու եւ կրակ բացելու: Գիտեք չեմ կարծում, որ Մաքսային Միության հետ կապ ունեն հայ-ադրբեջանական վերջին իրադարձությունները: Ալիեւը, Նազարբաեւը ասել են իրենց խոսքը: Պետք է նկատենք, որ ադրբեջանական կողմն ամեն ամիս կրակոցների թիվն ավելացնում է, նրանք նման քայլերով ուզում են ասել, որ հարձակվողական մտադրություններ ունեն: Ադրբեջանը ցանկանում է ցույց տալ, որ շատ ուժեղ է, պատրաստ է իր խնդիրներն ուժային մեթոդներով լուծել, սակայն պետք է ասեմ, որ դա ալիեւյան հերթական «բլեֆն» է:
-Իսկ ըստ Ձեզ, Ադրբեջանը պատրաստ է՞ պատերազմական գործողությունների:
-Ոչ, նրանք պատրաստ չեն պատերազմական գործողությունների: Պատերազմելու համար պետք է երեք բան ունենալ. պատերազմին պատրաստ պետություն, բանակ եւ հասարակություն: Ներկայումս նրանք ունեն միայն պետություն, որը պատրաստ է պատերազմել՝ նավթը, խավիարը, դոլարը, ամողջը պետության ձեռքում է: Ադրբեջանը պետք է ցույց տա, որ այդ գումարները ծախսում է նպատակային, նրանց ծրագրերի մեջ է մտնում նաեւ զենք առնելը եւ նման պահվածքով հանդես գալը:
-Իսկ խոշոր գումարների դիմաց գնված զինտեխնիկան բավարար է արդո՞ք պատերազմ սկսելու համար:
-Զինտեխնիկա գնելու համար պետք է մի բան հասկանալ, թե որտեղ ես դա կիրառելու ու ինչ կերպ: Օրինակ՝ Ղարաբաղ գնալու համար մենք երկու ճանապարհ ունենք, ու ընդամենը չորս կամ հինգ մեքենա կարող է գնալ այդ ճանապարհով, ենթադրենք թող իրենց բազային հարյուր տանկ էլ ավելացնեն, հետո ինչ՝ ճանապարհ չկա, որ այդքան տանկերով վրա գան: Այ, Ղարաբաղից Բաքու կարող ենք գնալ, ճանապարհները ավելի լայն են: Նրանք քաջ գիտակցում են, որ նախկին մեթոդներով պայքարելն անիմաստ է, պետք է պայքարել սեփական հողի համար, իսկ Ղարաբաղը մերն է: Անգամ սահմանին կանգնող զինվորն է դա հասկանում, նրանց զինվորները պաշտպանում են հայկական հողերը` հայերից:
-Համոզմունք կա, որ Ղարաբաղի հարցը միայն պատերազմով կարելի է լուծել, քաղաքական հանդիպումները խոշոր հաշվով ձեւական են, եւ այն ոչինչ չի տալու: Դե իսկ պատերազմն էլ շատ կարճ կտեւի, ընդամենը երեք-չորս օր: Դուք ի՞նչ կասեք այս ամենի հետ կապված:
-Մենք գիտենք, որ պատերազմները` ռմբակոծություններով են սկսում: Առհասարակ պատերազմը եւ՛ մեր, եւ՛ նրանց համար աղետալի հետեւանքներ կթողնի: Եթե սկսեն ռմբակոծել, խաղաղ բնակչությունը կտուժի: Նրանք մեզանից վախենալու շատ բան ունեն: Ղարաբաղին շատ մոտ են գտնվում արտասահմանյան խոշոր ներդրումները, որոնք բնականաբար Ադրբեջանինը չեն: Մենք այնպիսի հրթիռներ ունենք, որոնք նրանք չունեն եւ հենց դրանից էլ ադրբեջանցիները սարսափում են, որովհետեւ ներկայումս այդ հրթիռները չեն վաճառվում: Եթե մենք վնասենք նավթատար, գազատար խողովակները, ապա դա շատ լուրջ խնդրի առաջ կկանգնեցնի Ադրբեջանին: Նորից եմ կրկնում, եթե պատերազմ լինի, կտուժեն երկու կողմերն էլ. բայց Ադրբեջանում բառիս բուն իմաստով քաոս կտիրի, ամբողջ պետությունը կտրաքի: Իսկ ինչ վերաբերվում է պատերազմի տեւողությանը, ասեմ՝ մոտ երկու կամ երեք շաբաթ կտեւի, որովհետեւ այդ ժամանակահատվածում կարելի է ամեն ինչ մոխրացնել: Կովկասում երկար պատերազմ պարզապես չի կարող լինել, որովհետեւ տարածությունը փոքր է:
-Իսկ խոշոր գերտերությունները թույլ կտա՞ն, որ Ադրբեջան-Հայաստան պատերազմը սկսվի:
-Ադրբեջանին հստակ ասված է, ինչ ուզում եք գրեք, ինչ ուզում եք խոսեք հայերի դեմ, միայն թե մի կռվեք: Խոշոր ներդնողները արգելել են Ադրբեջանին ոչնչացնել իրենց կապիտալը:

Սոսե  Չանդոյան