Ալեքսանյանի և շաքարավազ սպառողների աչքը լույս լինի

Ըստ Bloomberg-ի Չինաստանի՝ էներգիայի ամենամեծ սպառողի տնտեսական աճի դանդաղելու հետևանքով շաքարավազի շուկայում ավելցուկ է հայտնվել, ինչն էլ հանգեցնելու է դրա գների նվազմանը, նշվում է նաև, որ բացի այդ վառելիքի գների նվազման արդյունքում նվազելու է նաև հացահատիկի և ընդհանրապես սննդամթերքի գինը:
Դե մեզանում ներմուծվող շաքարավազից ավելցուկ չի հասցնում մնալ,այդ պատճառով շաքարավազի գնի նվազում մեզանում չի հասցնում գրանցվել: Այնպես որ, Չինաստանը կերազեր նման արտադրողներ ունենալ:
Հայաստանում ցորենի ու շաքարավազի ներկրման մենաշնորհները պատկանում են ԱԺ պատգամավոր, ոչ մի բիզնես չունեցող Սամվել Ալեքսանյանին: Այդ ապրանքները Հայաստանում թանկանում են գրեթե օր օրի, ինչը բացատրում են դրամի արժեզրկմամբ եւ «տարածաշրջանի» գործընթացներով, ինչպես ասել է Հովիկ Աբրահամյանը: Սակայն հիշեցնենք, վարչապետը նաև հայտարարել էր, որ կառավարության խնդիրն է ստեղծված իրավիճակում կառավարության խնդիրը ներկրողների շահույթների ապահովումը և այն, որ ներկրողները հանկարծ չտուժեն:
Տնտեսագետների պնդմամբ Հայաստանում կրճատվում է սպառողական շուկան, ընկնում է մարդկանց գնողունակությունը, կրճատվում են տրանսֆերտները, որի արդյունքում ներկրողների շահույթն ապահովելու միակ ձևը ապրանքների թանկացումն է:
Մյուս կողմից, ներկրողների համար «տարածաշրջանում» առավել քան բարենպաստ պայմաններ են առաջանում ՝ համաշխարհային շուկայում ընկնում են առաջին անհրաժեշտության ապրանքների գները: Այսինքն, շահույթներն ապահովելու հարցում առաջանում է բարենպաստ իրավիճակ: Ներկրողները հիմա ավելի էժան ձեռք կբերեն այդ ապրանքները և ավելի թանկ կվերավաճառեն Հայաստանում: