Անմարդկային սպանություն է տեղի ունեցել

Երևանի Ավան և Նորք-Մարաշ վարչական շրջանների ընդհանուր իրավասության դատարանում սկսվել է Վազգեն Սարգսյանի անվան ռազմական ինստիտուտի կուրանտ Հայկազ Բարսեղյանի սպանության գործի քննությունը: Այսօր դատարան է եկել նաև ԲՀԿ կուսակցության ղեկավար Նաիրա Զոհրաբյանը:
«Անմարդկային սպանություն է տեղի ունեցել: Ցինիզմ եմ որակում բոլոր այն հայտարարությունները, որոնք արդարացնելով սպանությունը այն վերաձևակերպում են որպես ինքնասպանություն: Գիտեք, մենք որևէ բանով ծնողներին այլևս օգնել չենք կարող, որևէ մեկը երիտասարդին չի վերադարձնելու, որն ընդամենն ուզում էր իր ծառայությունը մատուցել իր հայրենիքին, բայց մեր բոլորի՝ քաղաքացիներիս, լրագրողներիս, պատգամավորներիս խնդիրը պիտի լինի, որ մեղավորը և մեղավորները, իսկ մեղավորները մի քանիսն են, հրահրողները և նման մթնոլորտ ստեղծողները պատժվեն»,-Fnews.am-ի հետ զրույցում  ասաց Նաիրա Զոհրաբյանը: Պատգամավորն ասաց, որ չեն ամոքելու ընտանիքի ցավը, բայց կարող են աջակից լինել, որ մեղավորները ստանան իրենց արժանի պատիժը: Նշենք, որ ՀՀ քննչական կոմիտեում հարուցված քրեական գործով մեղադրանք է առաջադրվել Հայկազ Բարսեղյանի 4 համածառայակցի: Նույն զորամասի զինծառայողներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Դեպքից հետո հարուցվել է նոր քրեական գործ՝ ՀՀ քրեական օրենսգրքի 375-րդ հոդվածի 1-ին մասի հատկանիշներով։