Անզգուշություն, որը կյանք է արժեցել

«Ղ-Տելեկոմ» ՓԲ ընկերության էլեկտրիկ Արտեմ Քոչարյանը հանդիսանալով գյուղում գտնվող և ընկերությանը պատկանող ալեհավաք կայանը սնող անվտանգության տեխնիկայի կանոնների պահպանման համար պատասխանատու անձ, 2015թ. օգոստոսի 24-ին, ժամը 11:30-ի սահմաններում ընկերության ավագ էլեկտրիկ Մ. Սիլիկյանի կարգադրությամբ մեկնել է Արմավիրի մարզի Քարակերտ գյուղ` պարզելու այդ էլեկտրական հաղորդալարերի վնասման պատճառը:

Վթարի վայրում Ա. Քոչարյանը կատարելով տեխնիկական զննում, պարզել է, որ «Գինու գործարան» 10կվ ՕԳ-ի թիվ 159 հենասյունից ճյուղավորումով սնվող, «Ղ-Տելեկոմ» ՓԲԸ հաշվեկշռում, սպասարկման և շահագործման տակ գտնվող 10կվ ՕԳ-ի 1-ին հենարանի հաղորդալարերից մեկը կտրված է: Դրանից հետո արդեն ընկերության էլեկտրիկը, ինչպես պարզվել է քրեական գործի նախաքննությամբ, թույլ է տվել խախտումներ, որոնք ողբերգական հետևանք են ունեցել:

Ա. Քոչարյանը լարման ցուցիչով հեռացրել է կտրված և գետնին ընկած հաղորդալարը հենարանից, սակայն, ըստ մեղադրական եզրակացության, խախտելով ՀՀ կառավարության 23.11.2006թ. թիվ 1933-Ն որոշմամբ հաստատված տեխնիկական կանոնագրքի 13-րդ գլխի 171-րդ կետի պահանջները, չի կազմակերպել գետնին ընկած 10կվ լարման հաղորդալարի պահպանությունը, չի տեղադրել հատուկ նախազգուշացնող նշաներ կամ պլակատներ հողակցման տեղին 8մ պակաս մարդկանց մոտենալը կանխելու համար և չի անջատել «Ղ-Տելեկոմ» ՓԲԸ-ի բջջային կապի կայանի էլ. սնուցման 10 կվ ՕԳ-ի վերջում` 8-րդ խարսխային հենարանի վրա տեղակայված ԼՏԵ 25/10 էլ. սնուցման PLAND 1 մակնիշի էլ. զատիչը, ինչն էլ հենց անզգուշությամբ առաջացրել է մարդու մահ:

Մասնավորապես, համաձայն քր. գործի նյութերի, Արմավիրի մարզի Քարակերտ գյուղի բնակիչ, ՀԷՑ ՓԲԸ «Մուսալեռ» մասնաճյուղի «Բաղղրամյանի ՇԷՑ»-ի օպերատիվ շրջիկ բրիգադի էլ. մոնտյոր Արամ Աբելյանը 2015թ. օգոստոսի 25-ին, ժամը 18-ի սահմաններում հիշյալ օդային գծի շրջայց և տարածքի զննում կատարելիս, մոտեցել է գետնին ընկած, բարձր լարման տակ գտնվող և պահպանությունը չապահոված հաղորդալարին 8մ-ից պակաս հեռավորության վրա և ընկնելով քայլի լարման տակ, մահացել:
Վերը նշված արարքի համար Արտեմ Քոչարյանին մեղադրանք է առաջադրվել ՀՀ քրեական օրենսգրքի 109-րդ հոդվածի («Անզգուշությամբ մահ պատճառելը») 1-ին մասի հատկանիշով, որը նախատեսում է ազատազրկում` առավելագույնը 3 տարի ժամկետով: