«Ապարան» ջոկատի հրամանատար Ռազմիկ Պետրոսյանին պատժում են.

«Ժողովուրդ» թերթը գրում է. «Երեկ «Ազատամարտի նվիրյալներ» ՀԿ անդամ, Ապարանի նախկին քաղաքապետ Ռազմիկ Պետրոսյանի դեմ ոստիկանության կազմակերպված հանցավորության դեմ պայքարի (նախկին 6-րդ) վարչություն բողողք է ներկայացվել: «Ժողովուրդ»-ը պարզեց, որ ազատամարտիկի դեմ ցուցմունք է տվել «Ռ.Վ գազ» ՍՊԸ-ի սեփականատերերից մեկը՝ ազատամարտիկ Վահագն Մխիթարյանի որդին՝ Ռաֆայել Մխիթարյանը:

Հիշեցնենք՝ «Ժողովուրդ»-ը գրել էր, որ դեռևս 2013թ. փետրվարի 5-ին «Ռ.Վ գազ» ՍՊԸ գազալցակայանում կրակոցներ էին հնչել: Գազալցակայանի սեփականատեր, 31-ամյա Ռաֆայել Մխիթարյանը կրակել էր Աշտարակի գազաֆիկացման և գազամատակարարման մասնաճյուղի տեսուչների վրա, քանի որ վերջիններս 3,5 միլիոն պարտքի դիմաց դադարեցրել էին գազալցակայանի գազի մատակարարումը:

Տեղի ունեցած միջադեպից հետո գազալցակայանի շուրջ առաջացած կրքերը դեռ չեն հանդարտվել: 2014թ. սեպտեմբերի 25-ին «Ժողովուրդ»-ի խմբագրություն այցելած Ռաֆայել Մխիթարյանը պատմել էր, որ Ապարանի նախկին քաղաքապետ, «Ապարան» ջոկատի հրամանատար, ազատամարտիկ Ռազմիկ Պետրոսյանը ցանկանում է տիրանալ իր՝ Աշտարակ-Էջմիածին խճուղում գտնվող «Ռ.Վ գազ» ՍՊԸ գազալցակայանին, ուստի մշտապես իր համար խնդիրներ է ստեղծել: Նշենք, որ «Ազատամարտի նվիրյալներ» ՀԿ անդամ, Ապարանի նախկին քաղաքապետ, ընդդիմադիր հայացքներով հայտնի Ռազմիկ Պետրոսյանը մեզ հետ զրույցում, անդրադառնալով Ռաֆայել Մխիթարյանի հայտարարությանը, ասել էր. «Ես քաղաքական դաշտում եմ, և բնական է՝ ինչ-որ բաներ պետք է փորձեն անել, թող անեն: Իրավապահ մարմինները թող աշխատեն: Եթե դիմել են իրավապահներին, ու մենք էլ հանցագործություն ենք կատարել, ուրեմն պետք է պատժվենք, ինչի մասին է խոսքը»:

Այս հրապարակումից 2,5 ամիս անց Ռաֆայելն իր մայրիկի հետ դիմել է ոստիկանություն և հայտնել, որ Ռազմիկ Պետրոսյանը զենքով ահաբեկում է իրեն, և ինքը ոստիկանություն է դիմել՝ ստեղծված իրավիճակին լուծում տալու համար. «Անհնար է աչք փակել այն ամենի վրա, ինչ անում է Ռազմիկ Պետրոսյանը: Ես մի կերպ իմ բնակարանն եմ փրկել, բայց կրկնում եմ՝ թույլ չեմ տա, որ իմ գազալցակայանը վերցնեն: Թե ինչ խարդախությամբ է Ռազմիկ Պետրոսյանն իմ գազալցակայանը վերցրել իր ձեռքը, այդ ամենը մանրամասն փաստաթղթերով ներկայացրել եմ ոստիկանություն: Կլինեն շատ մարդիկ, ովքեր կհաստատեն այս ամենը: Այս ամենը քաղաքականության հետ չկապեք: Ավելին՝ ես հայտարարում եմ, որ ոստիկանության զորքերի հրամանատար Լևոն Երանոսյանի հետ որևէ կապ չունեմ, ինչու եմ այս մասին ասում, քանի որ հիմա բոլորը կասեն, թե ես նրա մարդն եմ ու ամեն ինչ անում եմ՝ Ռազմիկ Պետրոսյանին բռնել տալու համար: Իմ և Ռազմիկ Պետրոսյանի կռիվն արդեն երկու տարի է, ինչ շարունակվում է»:

«Ժողովուրդ»-ի տեղեկություններով՝ ազատամարտիկ Ռազմիկ Պետրոսյանի դեմ նյութեր են նախապատրաստվում:

Մանրամասները՝ թերթի այսօրվա համարում։