Ապարդյո՞ւն, թե՞ անձնական այցեր պետության հաշվին

1in.am-ը գրում է . 
Հովիկ Աբրահամյանի Մոսկվա կատարած այցի մասին տարածված տեղեկատվությունը բավականին սուղ է: Հայտնի է միայն, որ եղել է ՌԴ վարչապետ Մեդվեդևի հետ առանձնազրույց, հետո պատվիրակության կազմերով հանդիպումներ, քննարկվել են երկկողմ հարցեր, և վերջ: Իսկ ինչ են քննարկել, ինչ են պայմանավորվել, ընդհանրապես ինչ խնդիրներ էին առաջացել, որ Հովիկ Աբրահամյանի Մոսկվա մեկնելու կարիքն էր եղել, ըստ էության չի հրապարակվում:

Այսինքն՝ Հայաստանի հասարակության համար անհասկանալի է, թե պետական բյուջեի վրա տասնյակ միլիոններ արժեցած հերթական գործուղումը ինչ է տվել պետությանը: Ինչպես որ, օրինակ, անհայտ մնաց, թե ինչ տվեց պետությանը, տնտեսությանը, քանի որ վարչապետը առաջին հերթին տնտեսության պատասխանատուն է, Հովիկ Աբրահամյանի՝ Ֆրանսիա կատարած երկօրյա այցը: Այդ այցն էլ, ըստ էության, անցավ առանց որևէ հստակ և հեռանկարային տնտեսական պայմանավորվածության մասին հաղորդագրության: Այսինքն՝ վերջին մի քանի օրերին, վարչապետ Հովիկ Աբրահամյանի գլխավորությամբ, հայկական կառավարական պատվիրակությունների երկու գործուղում է եղել արտասահման՝ Ֆրանսիա և Ռուսաստան, որոնցում Հայաստանի տնտեսության համար բարձրացված և լուծված և ոչ մի կարևոր, կարճաժամկետ, միջնաժամկետ կամ հեռանկարային պայմանավորվածության մասին խոսք չի եղել: Մինչդեռ այդ գործուղումները արժենում են տասնյակ միլիոն դրամներ, որոնք վճարվում են Հայաստանի հարկատուների հաշվին: Եվ հարկատուները պարզապես իրավունք ունեն տեղեկանալու այն արդյունքներից, որոնք պետք է լինեն իրենց հաշվին կատարվող այդ թանկարժեք գործուղումների ընթացքում: Հակառակ պարագայում, եթե չկան պետության համար կարևոր արդյունքների մասին տեղեկություններ, Հայաստանի հարկատուները լիովին իրավասու են, բոլոր հիմքերն ունեն մտածելու, որ այդ այցելությունները կատարվում են ոչ պետական նպատակներով, և պետության գումարները պարզապես ծախսվում են այցելող պատվիրակության ղեկավարների և անդամների անձնական խնդիրները հոգալու համար, անձնական հարցերի վերաբերյալ պայմանավորվածություններ ձեռք բերելու համար:

Ընդամենը մի քանի ամիս առաջ կառավարության որոշմամբ մի քանի տասնյակ միլիոնով ավելացվեցին գործուղումների համար պետական ծախսերը: Տարվա ընթացքում դրանք կազմում են հսկայական գումարներ, սակայն հասարակությունն այդ այցերի մեծ մասի վերաբերյալ չի ստանում ոչ մի հաշվետվություն:

Հաշվի առնելով Հայաստանի ներկայիս տնտեսական վիճակը, ամեն մի լումայի կարևորությունը՝ Հայաստանի կառավարությունը պարտավոր է ներդնել գործուղումների համար հաշվետվության ավանդույթ, հատկապես բարձրաստիճան պաշտոնյաների գործուղումների, որոնք ամենաթանկ գործուղումներն են, ըստ էության: Ամեն մի՝ տասնյակ միլիոններ արժեցող գործուղում, ըստ էության, մի քանի սոցիալապես անապահով ընտանիքի ճակատագիր է՝ բառի բուն իմաստով, երբ պաշտոնյաները օդ են բարձրանում օդանավով, իսկ քաղաքացիները ցած են նետվում կամուրջներից:

Ի դեպ, հերթական ողբերգական դեպքը արձանագրվել է հուլիսի 9-ի լույս 10-ի գիշերը. Կիևյան կամրջից ցած է նետվել 20-25 տարեկան երիտասարդ:

 1in.am