Արագած Ախոյանը խաչերը գցել է իսլամացած ու Հայաստանում չմկրտված հայուհիների վիզն ու ճանապարհել

ԱԺ պատգամավոր Արագած Ախոյանը Հայ Առաքելական Եկեղեցու խաչերը գցել է Դերսիմում բնակվող ու Հայաստանում մկրտվելու փորձերից հետո ձեռնունայն մեկնող իսլամացած երկու ծպտյալ հայուհիների պարանոցն ու ասել` «ուրախ գնացեք, քանի որ դուք հոգով քրիստոնյա եք արդեն»:
 

Այս մասին Tert.am-ին հայտնեց Արագած Ախոյանը, որը նաև «Արևտմահայոց ազգային համագումար» միջազգային հասարակական կազմակերպության լիազոր ներկայացուցիչ է։
 

«Ասացի` քանի որ հոգով քրիստոնյա եք, մնացե՛ք հոգով քրիստոնյա, հանգիստ կրեք խաչերը, մինչև որ օրինական կնունքի ծեսն ամեն հարց իր տեղը կդնի»,- ասաց Արագած Ախոյանը:

Նա պետք է լիներ աղջիկների կնքահայրը և խոստացել է նրանց կնքել կա՛մ Դերսիմում, կա՛մ հաջորդ տարի` Հայաստանում, երբ վերջիններս կրկին այցելեն Հայաստան: Իսկ աղջիկներն արցունքներն աչքերին հեռացել են:

Հիշեցենք, որ այս թեմայի առնչությամբ «Հրապարակ» օրաթերթը տեղեկացրել էր, որ  Պոլսի Պատրիարքի տեղապահ Արամ արքեպիսկոպոս Աթեշյանը ևս խոչընդոտներ է ստեղծել Հայ Առաքելական Եկեղեցի վերադառնալ ձգտող ծպտյալ հայերի համար, քանի որ նրանց առաջարկվել է առնվազն երեք տարի գնալ-գալ Հայաստան ու համապատասխան քննություններ հանձնել, որպեսզի հնարավոր լինի հասկանալ՝ արժե մկրտել, թե ոչ: Մայր Աթոռից բանավոր մեկնաբանություն չցանկացան տալ»,–գրում է թերթը։

Արագած Ախոյանն այս կապակցությամբ հայտարարեց, որ Արամ արքեպիսկոպոս Աթեշյանի` թուրքական իշխանությունների ցուցումով գործելը սրանով «վերահաստավում և ապացուցվում է», քանի որ ասաց.«Ի՞նչ է նշանակում` քննություն տալ, երեք տարի գնալ– գալ, մասնակցել պատարագներին։ Պատկերացնո՞ւմ եք, թե ինչպես ծպտյալ ընտանիքը պետք է ամեն օր կամ ամեն շաբաթ գա, մասնակցի պատարագներին»: